កីឡា

ភ្នំពេញក្រោន ប៉ះក្រុមខ្លាំង Central Coast វគ្គពាក់កណ្តាលផ្តាច់ព្រ័ត្រ AFC Cup តំបន់អាស៊ាន

បានផុស

១ year មុន

នៅ

ថ្ងៃសុក្រ ១៥ ធ្នូ ២០២៣

ដោយ

ក្លិបភ្នំពេញក្រោន បានក្លាយជាក្រុមកម្ពុជាដំបូងគេក្នុងប្រវត្តិសាស្រ្ត ដែលឆ្លងផុតវគ្គចែកពូលពានរង្វាន់លំដាប់ទី២ ទ្វីបអាស៊ី AFC Cup ក្រោយបញ្ចប់នៅចំណាត់ថ្នាក់លេខ២ល្អបំផុតក្នុងពូល F ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នំពេញក្រោន ត្រូវបន្តធ្វើការធ្ងន់ក្នុងវគ្គជម្រុះ៤ក្រុមចុងក្រោយ ប្រចាំតំបន់អាស៊ាន ដោយត្រូវជួបក្រុមខ្លាំងរបស់អូស្រ្ដាលីទៀតគឺ Central Coast Mariners FC ជាក្រុមឈរលេខ១ក្នុងពូល G ដែលពួកគេឆ្លងកាត់៦ប្រកួតគឺ ឈ្នះ៤ ចាញ់១ ស្មើ១ មាន១៥ពិន្ទុ។

Central Coast Mariners FC ជាក្រុមទី២របស់អូស្ត្រាលី ដែលភ្នំពេញក្រោន ជួបក្នុងពាន AFC Cup ឆ្នាំ២០២៣ បន្ទាប់ពីជួបក្រុម Macarthur FC នៅវគ្គសន្សំពិន្ទុក្នុងពូល។ ក្រុម Central Coast Mariners បច្ចុប្បន្នកំពុងឈរនៅចំណាត់ថ្នាក់៩ ក្នុងលីគកំពូលអូស្រ្ដាលី ដោយ៧ប្រកួតកន្លងទៅ ពួកគេឈ្នះ២ ចាញ់១ ស្មើ៤ ទើបមាន៧ពិន្ទុ។

ក្រុម Central Coast Mariners មានកីឡាករបរទេស៥រូប គឺខ្សែការពារសញ្ជាតិប្រេស៊ីល Mikael Doka, ខ្សែប្រយុទ្ធសញ្ជាតិប្រេស៊ីល Marco Túlio, ខ្សែប្រយុទ្ធសញ្ជាតិកូឡុំប៊ី Ángel Torres និងខ្សែបម្រើសញ្ជាតិហ្វីជី Dan Hall។

ក្រុមទាំង២សុទ្ធតែមានខ្សែប្រយុទ្ធឆ្នើមដូចគ្នាគឺខ្សែប្រយុទ្ធសញ្ជាតិប្រេស៊ីល Marco Túlio កំពុងឈរលេខ១ ក្នុងតារាងកីឡាកររកគ្រាប់បាល់ច្រើនជាងគេ AFC Cup ដោយរកបាន៨គ្រាប់ តាមពីក្រោយដោយខ្សែប្រយុទ្ធភ្នំពេញក្រោន Shintaro Shimizu រកបាន៧គ្រាប់។

ការប្រកួតវគ្គពាក់កណ្តាលផ្តាច់ព្រ័ត្រប្រចាំតំបន់អាស៊ានមានតែ១ជើងប៉ុណ្ណោះដោយភ្នំពេញក្រោនត្រូវធ្វើដំណើរទៅទឹកដីរបស់ Central Coast Mariners ថ្ងៃទី១៣ ខែកុម្ភៈ ឆ្នាំ២០២៤៕