លោក ម៉ែន អេង ចុះផ្សព្វផ្សាយប្រព័ន្ធប្រកាសឱ្យដឹងមុន”១២៩៤” ដល់ពលរដ្ឋ ក្នុងឃុំកំពង់ត្រាច ស្រុករមាសហែក

លោក ម៉ែន អេង អភិបាលរងខេត្តស្វាយរៀង កាលពីរសៀលម្សិលមិញ បានចុះដឹកនាំផ្សព្វផ្សាយប្រព័ន្ធប្រកាសឱ្យដឹងមុន “១២៩៤” ដល់ប្រជាពលរដ្ឋស្ថិតនៅក្នុង ឃុំកំពង់ត្រាច ស្រុករមាសហែក ខេត្តស្វាយរៀង។

លោក ម៉ែន អេង អភិបាលរងខេត្ត បានលើកឡើងថា ការត្រៀមទុកជាមុននៅក្នុងការការពារគ្រោះមហន្តរាយវាជារឿងសំខាន់ និងចាំបាច់សម្រាប់ប្រជាពលរដ្ឋគ្រប់រូប ទាំងនៅក្នុងខេត្ត និងក្រៅខេត្ត។ លោកថា៖ «នៅពេលណាដែលយើងបានត្រៀមទុកជាមុននូវអ្វីដែលនឹងកើតឡើង នោះយើប្រាកដណាស់ថា នឹងបានជៀសផុតនូវគ្រោះមហន្តរាយផ្សេងៗបានយ៉ាងល្អ។ ហេតុដូច្នេះ ទើបក្រុមការងារបានបង្ហាត់បង្ហាយនៅកម្មវិធី ផ្សព្វផ្សាយប្រព័ន្ធប្រកាសឱ្យដឹងមុន “១២៩៤” នេះ»។

លោកអភិបាលរងខេត្ត បានបន្តថា ទោះជាស្ថិតនៅក្នុងស្ថានភាពណាក៏ដោយ (ទាំងរដូវប្រាំង រដូវវស្សា) ត្រូវការពារខ្លួន និងក្រុមគ្រួសារឱ្យបានល្អប្រសើរ និងទទួលបាននូវសុវត្តិភាពខ្ពស់ក្នុងការគេចចេញពីគ្រោះមហន្តរាយដែលបានកើតឡើងនោះ។ ជាពិសេស ឳពុកម្តាយ ឬអាណាព្យាបាលគ្រប់រូប ត្រូវយកចិត្តទុកដាក់ឱ្យបានខ្ពស់ និងតាមដានរាល់ព័ត៌មានដែលបានចាក់ផ្សាយតាមទូរទស្សន៍ ឬប្រព័ន្ធផ្សព្វផ្សាយផ្សេងៗ ដែលនិយាយពីគ្រោះមហន្តរាយដែលបានកើតឡើង ឬមិនទាន់បានកើតឡើង ដែលមានប្រភពច្បាស់លាស់ ដើម្បីងាយស្រួលនៅក្នុងការត្រៀមទុកជាមុន ៕

 ដោយ៖ ភក្ដី