បដិមាទេពស្រីសម័យអង្គរនឹងត្រូវបញ្ជូនមកកម្ពុជាវិញ ក្រោយបាត់ដំណឹងជាង ២ ទស្សវត្សរ៍

វត្ថុបុរាណខ្មែរចំនួន ១៤ រូប នឹងត្រូវបញ្ជូនពីទីក្រុងញូវយ៉កសហរដ្ឋអាមេរិក មកឱ្យកម្ពុជាវិញនៅពេលខាងមុខ។ ក្រសួងវប្បធម៌ និងវិចិត្រសិល្បៈ បានប្រកាសថា វត្ថុទាំង ១៤ ដែលត្រូវបញ្ជូនមកកម្ពុជាវិញរួមមានស្នាដៃឯកមួយចំនួន ដូចជារូបចម្លាក់ទេពស្រី (ព្រះនាងឧមា) ធ្វើពីថ្មភក់សតវត្សរ៍ទី ១០ ដែលមានភស្តុតាងពីសាក្សីត្រូវបានលួចយកនៅឆ្នាំ ១៩៩៧ ដោយប្រអប់ជើងជាប់ជាមួយជើងទម្របដិមានេះ បានរកឃើញតាមរយៈការធ្វើកំណាយនៅឆ្នាំ ២០២១ នៅក្នុងរមណីយដ្ឋានអតីតរាជធានីកោះកេ។

លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈមានប្រសាសន៍ថា ការបញ្ជូនត្រឡប់មកវិញ នូវសម្បត្តិវប្បធម៌ ាមានសារសំខាន់បំផុតមិនត្រឹមតែសម្រាប់ប្រជាជនកម្ពុជានោះទេ ប៉ុន្តែសម្រាប់មនុស្សជាតិទាំងមូលផងដែរ។

វត្ថុបុរាណខ្មែរជាច្រើនទៀត កំពុងស្ថិតនៅក្នុងសារមន្ទិរ MET ហើយកម្ពុជារំពឹងថា វត្ថុទាំងនោះនឹងវិលត្រឡប់មកម្ពុជាវិញ។