ប្រធានាធិបតីហ្វីលីពីន ថា ភាពតានតឹងនៅសមុទ្រចិនខាងត្បូងកាន់តែស្មុគស្មាញខ្លាំង

ប្រធានាធិបតីហ្វីលីពីនលោក Ferdinand Marcos Jr. និយាយថា ភាពតានតឹងជាមួយចិននៅសមុទ្រចិនខាងត្បូងបានកើនឡើងក្នុងប៉ុន្មានខែថ្មីៗនេះ។ ស្របពេលដែលលោក​ស្នើ​ឲ្យ​​ជប៉ុន និង​អាស៊ាន​គួរ​បង្កើន​កិច្ច​សហប្រតិបត្តិការ​ក្នុង​វិស័យ​សន្តិសុខ ខណៈ​ដែល​ពួកគេ​បាន​និង​កំពុង​ធ្វើ​លើ​បញ្ហា​សេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Marcos Jr. បានផ្ដល់បទសម្ភាសន៍ផ្តាច់មុខជាមួយសារព័ត៌មាន NHK កាលពីថ្ងៃសៅរ៍នៅទីក្រុងតូក្យូ ក្នុងពេលដែលលោកកំពុង​ស្ថិត​ក្នុង​រដ្ឋធានី​របស់​ប្រទេស​ជប៉ុន​ ដើម្បី​ចូលរួម​ក្នុង​កិច្ចប្រជុំ​កំពូល​ពិសេស​មួយ​ដែល​ប្រារព្ធ​ខួប​៥០​ឆ្នាំ​នៃ​មិត្តភាព​រវាង​ជប៉ុន​និង​អាស៊ាន។

ប្រធានាធិបតីហ្វីលីពីនរូបនេះនិយាយថា ភាពតានតឹងជាមួយចិននៅក្នុងតំបន់បានកើនឡើងក្នុងប៉ុន្មានខែថ្មីៗនេះ ហើយស្ថានភាពកាន់តែស្មុគស្មាញ។ ដូច្នេះ អ្នកចូលរួមក្នុងកិច្ចប្រជុំកំពូលជប៉ុន-អាស៊ាន ត្រូវតែស្វែងរកមធ្យោបាយដើម្បីរក្សាសន្តិភាព។

លោក Marcos Jr. បានសង្កត់ធ្ងន់ជាចុងក្រោយថា ហ្វីលីពីនក៏នឹងធ្វើឲ្យស៊ីជម្រៅផងដែរនូវកិច្ចសហប្រតិបត្តិការត្រីភាគីជាមួយជប៉ុន និងសហរដ្ឋអាមេរិក ហើយស្វែងរកកិច្ចសហប្រតិបត្តិការជាមួយប្រទេសជាច្រើនទៀតដោយធ្វើសមយុទ្ធរួម។

សូមបញ្ចាក់ដែរថា នាពេលថ្មីៗនេះ កប៉ាល់របស់រដ្ឋាភិបាលចិនបាននឹងកំពុងប្រើប្រាស់កាណុងបាញ់ទឹកលើនាវាហ្វីលីពីន និងរារាំងការធ្វើនាវាចរណ៍របស់ពួកគេនៅក្នុងសមុទ្រចិនខាងត្បូង ដែលនេះបានធ្វើឲ្យមានភាពតានតឹងកានតែខ្លាំងរវាងប្រទេសទាំងពីរ៕

ប្រែសម្រួល៖ សាង ស្រីល័ក្ខ

ប្រភព.NHK

ចុចអាន៖មិនខ្វល់ ចិន សម្របសម្រួលបទឈប់បាញ់ មីយ៉ាន់ម៉ា នៅតែផ្ទុះការប្រយុទ្ធ​គ្នា