ក្រុមហ៊ុន ជប៉ុន ដាក់តម្លៃចរចាជាង ១៤ ពាន់លានដុល្លារទិញយកក្រុមហ៊ុនដែក អាមេរិក

ក្រុមហ៊ុនផលិតដែកដ៏ធំបំផុត​របស់ជប៉ុន Nippon Steel បានឲ្យតម្លៃជាង ១៤ ពាន់លានដុល្លារ ក្នុងការចរចាទិញយកក្រុមហ៊ុនផលិតដែករបស់អាមេរិក US Steel ។​

នៅក្នុងកិច្ចព្រមព្រៀងនោះ ក្រុមហ៊ុន Nippon​ នឹងបង់ប្រាក់ចំនួន ៥៥ ដុល្លារក្នុងមួយហ៊ុន​ ​ហើយការទិញយកនេះត្រូវបានគេរំពឹងថា នឹងនាំមកនូវសមត្ថភាពផលិតដែកថែបឆៅប្រចាំឆ្នាំសរុបរបស់ខ្លួនដល់ទៅ ៨៦ លានតោន ខណៈមុននឹងចរចាជាមួយ​ក្រមហ៊ុនដែកជប៉ុន ក្រុមហ៊ុន​ US Steel ធ្លាប់បានបដិសេដសំណើរ​ពីដៃគូរប្រជែង Cleveland-Cliffs ក្នុងតម្លៃ ៧.២៥ ពាន់លានដុល្លារកាលពីខែសីហាកន្លងទៅ ។

ទន្ទឹមនោះ តាមការបញ្ជាក់ពីនាយកប្រតិបត្តិ Nippon Steel បានឲ្យដឹងថា ​ក្រុមហ៊ុននឹងដាក់ក្រុមហ៊ុនដែកអាមេរិក​ធ្វើជាបុត្រសម្ព័ន្ធ ដោយរក្សា​ឈ្មោះដើម និងការិយាល័យកណ្តាលនៅទីក្រុង Pittsburgh ដដែល ។

ស្របពេលជាមួយគ្នានេះ ប្រសិនបើទិញបានក្រុមហ៊ុនដេកអាមេរិកនោះមែន Nippon Steel នឹងក្លាយជាក្រុមហ៊ុនផលិតដែកដ៏ធំបំផុតលំដាប់លេខ ៣ របស់ពិភពលោក បន្ទាប់ពីក្រុមហ៊ុនចិន Baowu Steel Group ស្ថិតនៅលំដាប់លេខ ១ ។

គួរបញ្ជាក់ថា US Steel ធ្លាប់ជាក្រុមហ៊ុនធំជាងគេលើពិភពលោកដែលបានដើរតួយ៉ាងសំខាន់នៅក្នុងឧស្សាហកម្មអាមេរិកអស់រយៈពេលជាងមួយសតវត្សមកហើយ ហើយក្រុមហ៊ុនក៏បានផ្គត់ផ្គង់ដល់យោធានូវសម្ភារៈសម្រាប់ផលិតយន្តហោះចម្បាំង កប៉ាល់ និងរថក្រោះក្នុងអំឡុងពេលសង្គ្រាមលោកទាំងពីរផងដែរ ៕

ប្រែសម្រួល៖ នាង រតនៈ

ប្រភព៖​ Japan Times