ចិន ឆ្លើយតបទៅ ជប៉ុន រឿងកិច្ចសហប្រតិបត្តិការសន្តិសុខដែនសមុទ្រ​ជាមួយ អាស៊ាន

ជាការឆ្លើយតបទៅនឹងកិច្ចព្រមព្រៀងរវាងជប៉ុន និង​ប្រទេស​អាស៊ីអាគ្នេយ៍ស្ដីពីការធ្វើឲ្យទំនាក់ទំនងកាន់តែស៊ីជម្រៅពាក់ព័ន្ធបញ្ហាសេដ្ឋកិច្ច និងសន្តិសុខដែនសមុទ្រ, ប្រទេស​ចិនកាលពីថ្ងៃចន្ទបាន​ជំរុញឲ្យ​ជប៉ុន​គោរពតាម​កិច្ច​ខិតខំ​ប្រឹងប្រែង​របស់អាស៊ានដើម្បី​សម្រេចបាននូវ​សន្តិភាព ​និង​ស្ថិរភាព​ក្នុង​តំបន់ ។

នៅពេលអ្នកសារព័ត៌មានសួរនាំអំពីកិច្ចសហប្រតិបត្តិការថ្មីរបស់រដ្ឋាភិបាលទីក្រុងតូក្យូជាមួយអាស៊ាន, អ្នកនាំពាក្យក្រសួងការបរទេសចិនលោក Wang Wenbin បាននិយាយថា “ប្រទេសចិនជឿជាក់លើកិច្ចសហប្រតិបត្តិការទាំងអស់គួរតែមានលក្ខណៈអំណោយផលដល់ការជឿទុកចិត្តគ្នាទៅវិញទៅមកកាន់តែស៊ីជម្រៅរវាងប្រទេសនៅក្នុងតំបន់ ហើយមិនគួរកំណត់គោលដៅលើភាគីទីបីណាមួយឡើយ” ។

យោងតាមក្រសួងការបរទេស លោក Wang Wenbin បាននិយាយទៀតថា “ស្ថានភាពនៅសមុទ្រចិនខាងកើត និងខាងត្បូងជាទូទៅមានស្ថិរភាព ហើយយើងសង្ឃឹមថា បណ្តាប្រទេសពាក់ព័ន្ធនឹងគោរពយ៉ាងស្មោះស្ម័គ្រចំពោះកិច្ចខិតខំប្រឹងប្រែងរបស់ប្រទេសក្នុងតំបន់ដើម្បីការពារសន្តិភាព និងស្ថិរភាព” ។

ទន្ទឹមនោះ នៅក្នុងកិច្ចប្រជុំកំពូលនៅទីក្រុងតូក្យូកាលពីចុងសប្តាហ៍ មេដឹកនាំជប៉ុន និងអាស៊ានក៏បានប្ដេជ្ញានឹងបង្កើនកិច្ចសហប្រតិបត្តិការលើសន្តិសុខដែនសមុទ្រ ពង្រឹងខ្សែសង្វាក់ផ្គត់ផ្គង់ លើកកម្ពស់ការអនុវត្តថាមពលប្រកបដោយនិរន្តរភាព ក៏ដូចជាពង្រីកការផ្លាស់ប្តូររវាងប្រជាជន និងប្រជាជនក្នុងវិស័យផ្សេងៗផងដែរ ។

គួរបញ្ជាក់ថា ប្រទេសជប៉ុនបានបញ្ចប់ការរៀបចំកិច្ចប្រជុំកំពូលពិសេសជាមួយបណ្ដាមេដឹកនាំអាស៊ានរយៈពេល ៣ ថ្ងៃ កាលពីថ្ងៃទី១៨ ខែធ្នូ ខណៈក្នុងជំនួបនោះក៏ដើម្បីរំឭកខួបលើកទី ៥០ នៃទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសជប៉ុន និងអាស៊ានផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ជប៉ុន ប្ដេជ្ញាដឹកនាំ អាស៊ី ឆ្ពោះទៅរកអព្យាក្រឹតភាពកាបូន