ប្រេងសាំងរក្សាតម្លៃ ៤១៥០រៀល ក្នុងសប្តាហ៍នេះ ខណៈម៉ាស៊ូតចុះថ្លៃ ៥០រៀល

ប្រេងសាំងរក្សាតម្លៃ ៤១៥០រៀល ខណៈម៉ាស៊ូតធ្លាក់ចុះថ្លៃ ៥០រៀល មកត្រឹម ៤១០០រៀល ក្នុងមួយលីត្រ នៅសប្តាហ៍នេះ។ នេះបើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម នៅថ្ងៃទី ២១ ធ្នូ។

បើតាមក្រសួងពាណិជ្ជកម្ម តម្លៃនេះចាប់អនុវត្តពីថ្ងៃទី២១ ដល់ថ្ងៃទី ៣១ ខែធ្នូ ឆ្នាំ២០២៣។ អ្នកនាំពាក្យក្រសួង​ពាណិជ្ជកម្ម លោក ប៉ែន សុវិជាតិ ធ្លាប់បានប្រាប់កម្ពុជាថ្មីថា បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ បាននាំ​ចូលពី​ប្រទេសសិង្ហបុរី ថៃ និងវៀតណាម។ ក្រុមហ៊ុនលក់រាយនៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែល​នាំចូល​ប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។

សូមបញ្ជាក់ថា ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក៕