កីឡា

ស្អែកប្លែកភ្នែក! ធឿន ធារ៉ា និង រឿង សុភ័ណ្ឌចាប់ដៃគ្នាប្រយុទ្ធលើទីលានវាលស្មៅ

បានផុស

១១ ខែ មុន

នៅ

ថ្ងៃព្រហស្បតិ៍ ២១ ធ្នូ ២០២៣

ដោយ

ជើងខ្លាំងគុនខ្មែរ ធឿន ធារ៉ា និង រឿង សុភ័ណ្ឌ លេងជាខ្សែប្រយុទ្ធមុតស្រួចពេលក្រុមអ្នកលេងគុនខ្មែរ ប៉ះ ក្រុមតារាសិល្បៈ ផ្ការីកគ្រប់រដូវ ក្នុងជំនួបមិត្តភាពសប្បុរសធម៌ វេលាម៉ោង៦ល្ងាចនៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកគាំទ្រធ្លាប់តែឃើញកីឡាករប្រដាល់ល្បីៗបង្ហាញសាច់ដុំនៅសង្វៀនស្រក់ឈាម ប៉ុន្តែពេលនេះនឹងប្លែកភ្នែក ចម្លែកអារម្មណ៍នៅពេលអ្នកលេងគុនខ្មែរសហការគ្នាប្រយុទ្ធនៅលើទីលានវាលស្មៅធម្មជាតិដើម្បីទម្លាយសំណាញ់ទីវិញម្តង។

តាមការបង្ហាញទម្រង់លេងរបស់ក្រុមអ្នកលេងគុនខ្មែរគឺ ៤-៣-១-២ ដែលមាន ស៊ីថា ជាអ្នកចាំទី ខ្សែការពារខ្លាចាស់ស្មងទារព្រលឹង ក្រាក់ សម្ភស្ស អ្នកលេងក្បាច់ យ៉េន ឌីណា រន្ទះជើង-កែងពិឃាដ ឈឿង ល្វៃ និង រិន ដេវីត ចាប់ដៃគ្នាក្នុងតំបន់ការពារ។

អ្នកលេងកំពូលក្បាច់ សុខ ធី ហៅកាកា ចាប់ដៃជាមួយ ឡុង សំណាង និង ម៉ឺន មេឃា ជាខ្សែបម្រើការពារ។ ស្របពេលអ្នកលេងកម្ពស់ អេ អាំម៉ារីនភូថង ដើរតួជាខ្សែបម្រើប្រយុទ្ធកណ្តាលដើម្បីគាំទ្រដល់ខ្សែប្រយុទ្ធមុតស្រួចទាំងពីរគឺ រឿង សុភ័ណ្ឌ និង ធឿន ធារ៉ា។

ក្រុមតារាគុនខ្មែរត្រូវប្រឈមនឹងទម្រង់លេង ៤-៣-៣ របស់ក្រុមផ្ការីកគ្រប់រដូវដែលមានបទពិសោធច្រើននៅលើទីលានវាលស្មៅ។ ត្រា យ៉ាកូរ ជាអ្នកចាំទីដែលមានកម្លាំងការពារសំខាន់ពីតារាកម្លែងមុខស្ងួត នាយ គ្រឿន នាយក្តី ចាប់ដៃជាមួយតារាសម្តែង គិរី និង ពៅ ពិសិដ្ឋ។

នៅតំបន់បម្រើវិញ ប្រុសស្អាត លឹម ជាឡាយ ជា សុវណ្ណនរាហ៍ និង ឡៅ បញ្ញា ដែលអ្នកទាំង៣ជាកម្លាំងសំខាន់ជួយដល់ខ្សែប្រយុទ្ធជួរមុខ៣រូបគឺតារាកម្លែងនាយ ពាក់មី តារាចម្រៀង ភិទិ និងកឺកឺ។

ជំនួបមិត្តភាពនេះត្រូវបានប្រសិទ្ធនាមថា «7777$» ដើម្បីប្រមូលថវិកាជួយដល់មន្ទីរពេទ្យគន្ធបុប្ផាដែលអាចចូលទស្សនាបានដោយសេរី និងផ្សាយផ្ទាល់តាមទូរទស្សន៍ CNT នៅវេលាម៉ោង៦ល្ងាច ថ្ងៃសុក្រ ទី២២ ខែធ្នូ ឆ្នាំ២០២៣៕

អត្ថបទ៖ វីរបុត្រ