ពីស្អែកនេះ ភ្នំពេញមានព្រឹត្តិការណ៍ធំអបអរខួបទី២៥ នៃនយោបាយ ឈ្នះ ឈ្នះ និងឆ្លងឆ្នាំសកល ៣យប់ជាប់គ្នា

ចាប់ពីថ្ងៃទី២៩-៣១ ខែធ្នូ ឆ្នាំ២០២៣ នៅវិមានឈ្នះឈ្នះ នឹងមានរៀបចំព្រឹត្តិការណ៍ធំមួយ ដើម្បីអបអរសាទរខួបទី២៥ នៃនយោបាយ ឈ្នះ ឈ្នះ និងដើម្បីអបអរឱកាសឆ្លងឆ្នាំសកល ឆ្នាំ២០២៣ ឈានចូលឆ្នាំ២០២៤ ដែល​បើក​ឱ្យ​សាធារណជន​ចូល​រួម​ដោយ​សេរី។ នេះបើតាមការផ្សព្វផ្សាយរបស់ ក្រសួងទេសចរណ៍ កាលពីយប់ថ្ងៃទី២៧ ខែធ្នូ ឆ្នាំ២០២៣ ។

យោងតាមដំណឹងដែលចេញផ្សាយដោយ ក្រសួងទេសចរណ៍ ព្រឹត្តិការណ៍អបអរនេះ ជាព្រឹត្តិការណ៍ប្រគុំដ៏អស្ចារ្យមួយ ដែលមានសិល្បករ សិល្បការិនីល្បីៗជាច្រើនរូប រួមនឹងការសម្ដែងចម្រុះផងដែរ។ ក្រៅពីនេះ នៅមានស្ដង់ពិព័រណ៍នានា ដូចជាស្តង់អាហារ និងទំនិញដ៏សម្បូរបែបទៀតផង។

សូមជម្រាបថា សាធារណជន អាចចូលរួមរីករាយកម្សាន្តជាមួយព្រឹត្តិការណ៍នេះទាំង ៣ថ្ងៃ ដោយសេរី ចាប់ពីវេលាម៉ោង ៦ល្ងាចទៅ នៅទីតាំងវិមាន ឈ្នះ ឈ្នះ តែម្តង៕