រំលឹកដល់នាវា westerdam៖  សម្តេច ហ៊ុន សែន ថា “តាំងពីដើមដល់ចប់សិទ្ធិរស់រានមានជីវិតសំខាន់ជាងគេ”

“សម្រាប់ខ្ញុំពីដើមដល់ចប់សិទ្ធរស់រានមានជិវិតគឺជាចំណុចសំខាន់ជាងគេ ព្រោះបើស្លាប់ទៅហើយ តើមានសិទ្ធនិងប្រជាធិបតេយ្យអ្វីទៀត”។ នេះគឺជាសំណេរនៅលើប្រព័ន្ធតេឡេក្រាម ដែលសម្ដេចតេជោ សរសេរអះអាងពីគោលជំហរផ្ទាល់ខ្លួនតាំងពីដើមរហូតមកដល់បច្ចុប្បន្ន ភ្ជាប់ជាមួយវីដេអូសកម្មភាពរាំកំសាន្តរបស់ភ្ញៀវទេសចរណ៍អន្តរជាតិលើនាវា westerdam មុនពេលនាវាចាកចេញពីកម្ពុជា។

លើសពីនេះ សម្ដេចតេជោ ក៏បានសរសេរចោទសួរទៅកាន់អ្នកដែលតាំងខ្លួនជាបិតាសិទ្ធមនុស្ស និងលទ្ធិប្រជាធិបតេយ្យថា  “ពេលនោះប្រសិនកម្ពុជាមិនឱ្យនាវានេះចូលចត តើជិវិតមនុស្សនៅលើវានានេះទៅជាយ៉ាងណា? ស្លាប់ប៉ុន្មាននៅរស់ប៉ុន្មាន”?

សម្ដេចសរសេរបន្ថែមថា សម្ដេចចង់បានចម្លើយពីអ្នកតាំងខ្លួនជាបិតាសិទ្ធមនុស្ស និងលទ្ធិប្រជាធិបតេយ្យឆ្លើយជាមួយសំណួរនេះ។

ជាក់ស្ដែងនាវា westerdam បានចូលចតនៅកំពង់ផែស្វយ័តក្រុងព្រះសីហនុ នាពេលព្រឹកថ្ងៃទី២៨ ខែធ្នូ ឆ្នាំ២០២៣ តាមការសន្យារបស់ប្រធាននាវាកាលពី៣ឆ្នាំមុន ពោលគឺពេលដែលសម្ដេចតេជោ ហ៊ុន សែន បើកបេះដូងមនុស្សធម៌ឱ្យនាវាWesterdam ចូលចតគ្រាដែលជម្ងឺកូវីដ១៩កំពុងរាតត្បាតពេញសកលលោកដែលធ្វើឱ្យប្រទេសមួយចំនួនមិនហ៊ានឱ្យនាវានេះចូលចត។ក្រោយចូលចតក្នុងកំពង់ផែកម្ពុជារយៈពេលប្រមាណ១៣ម៉ោង នាវាបានចាកចេញពីដែនសមុទ្ររបស់កម្ពុជាសំដៅទៅប្រទេសផ្សេងទៀត នាវេលាម៉ោង៩៖០០នាទីយប់ថ្ងៃដដែល។

រយៈពេល១៣ម៉ោង ក្នុងប្រទេសកម្ពុជា ភ្ញៀវចម្រុះជាតិសាសន៍ទាំងនោះ ត្រូវបានក្រសួងទេសចរណ៍កម្ពុជា និងរដ្ឋបាលខេត្តព្រះសីហនុ បដិសណ្ធារកិច្ចដូចជា បំពាក់ក្រមា សម្ដែងសិល្បៈបុរាណខ្មែរ ផ្ដល់នូវនំបុរាណខ្មែរជូនភ្ញៀវទាំងនោះទស្សនា។ រឿងដែលគួរឱ្យកត់សម្គាល់នោះគឺ មុនពេលចាកចេញនោះ ភ្ញៀវទេសចរណ៍បានរាំលេងយ៉ាងសប្បាយរីករាយជាមួយសិល្បករសិល្បការនីរបស់កម្ពុជា ដែលសម្ដែងរបាំបុរាណជូនភ្ញៀវអន្តរជាតិទាំងនោះបានទស្សនា៕