រុស្ស៊ី បាញ់ស្រោចមីស៊ីលទ្រង់ទ្រាយធំបំផុត មិនធ្លាប់មានលើអ៊ុយក្រែន ចាប់តាំងពីសង្គ្រាមផ្ទុះឡើង

មនុស្សចំនួន៣០នាក់ ត្រូវបានសម្លាប់នៅក្នុងអ្វី ដែលអ៊ុយក្រែននិយាយថា ជាការបាញ់ស្រោចមីស៊ីលទ្រង់ទ្រាយធំបំផុតរបស់រុស្ស៊ី មិនធ្លាប់មានសោះចាប់តាំងពីសង្គ្រាមផ្ទុះឡើងកាលពីខែកុម្ភៈឆ្នាំ២០២២មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះ មនុស្សជាង១៦០នាក់ ក៏ត្រូវរបួសផងដែរ នៅពេលរុស្ស៊ី បើកការវាយប្រហារលើទីក្រុង Kyiv, Odesa, Dnipropetrovsk, Kharkiv និង Lviv កាលពីព្រឹកព្រលឹមថ្ងៃសុក្រ (ពេលវេលានៅអ៊ុយក្រែន)។

ទន្ទឹមនោះ ប្រធានាធិបតីអ៊ុយក្រែន លោក Volodymyr Zelensky និយាយថា ប្រទេសរុស្ស៊ី បានយកអាវុធស្ទើរតែគ្រប់ប្រភេទចេញពីឃ្លាំងមកប្រើ ដើម្បីកម្ទេចផ្ទះ និងមន្ទីរពេទ្យ ខណៈកងកម្លាំងទ័ពអាកាសអ៊ុយក្រែនក៏និយាយដែរថា ខ្លួនមិនធ្លាប់ឃើញរុស្ស៊ី បាញ់មីស៊ីលច្រើនគ្រាប់ក្នុងពេលតែមួយដូចពេលនេះទេ។

តាមការបញ្ជាក់ពីអ្នកនាំពាក្យកងទ័ពអាកាស, រុស្ស៊ីបានប្រើប្រាស់មីស៊ីលល្បឿនលឿនជាងសំឡេង មីស៊ីលផ្លោងនិងមីស៊ីលបាលីស្ទិក រួមទាំងប្រភេទ X-22 ដែលពិបាកស្ទាក់ចាប់ផងដែរ។ យ៉ាងណា មីស៊ីល និងដ្រូនចំនួន ១១៤ គ្រឿងក្នុងចំណោម ១៥៨ គ្រឿង ត្រូវបាញ់ទម្លាក់។

ការវាយប្រហារនេះកើតឡើង បន្ទាប់ពីកងទ័ពអាកាសអ៊ុយក្រែន បាញ់មីស៊ីលកម្ទេចនាវាចម្បាំងខ្នាតយក្សមួយគ្រឿងរបស់រុស្ស៊ី ដែលកំពុងចូលចតនៅក្នុងកំពង់ផែ Feodosia នៃតំបន់គ្រីមៀ។ ហេតុការណ៍នោះ បានសម្លាប់មនុស្សម្នាក់ និង ៤ នាក់ផ្សេងទៀតរងរបួស ស្របពេល សម្ព័ន្ធមិត្តលោកខាងលិច ចាត់ទុកការវាយប្រហារថា ជាឧបសគ្គដ៏ធំមួយសម្រាប់កងទ័ពជើងទឹករុស្ស៊ី។

បន្ទាប់ពីហេតុការណ៍នោះ រដ្ឋមន្ត្រីការពារជាតិរុស្ស៊ី លោក Sergei Shoigu ក៏បានជូនដំណឹងទៅដល់លោកប្រធានាធិបតី Vladimir Putin អំពីការខូចខាតនាវា។

Novocherkassk គឺជានាវាខ្នាតយក្សដែលអាចប្រើប្រាស់សម្រាប់ដឹកជញ្ជូនទាហាន ក៏ដូចជារថក្រោះ និងរថពាសដែកផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ុយក្រែន បាញ់មីស៊ីលកម្ទេចនាវាចម្បាំង រុស្ស៊ី ក្រោយសង្ស័យដឹកយន្តហោះ​ដ្រូន និងគ្រឿងផ្ទុះមកពី អ៊ីរ៉ង់