ឆេះម៉ូតូ៣០គ្រឿង ក្នុងហេតុការណ៍អគ្គិភ័យ​ឆេះ​រោងចក្រកាត់ដេរនៅខណ្ឌដង្កោ

ម៉ូតូរបស់កម្មករកម្មការិនីចំនួន៣០គ្រឿងត្រូវបានអគ្គិភ័យឆាបឆេះអស់ទាំងស្រុង និងខូចខាតសម្ភារៈមួយចំនួនក្នុងហេតុគ្រោះអគ្គិភ័យឆេះរោងចក្រកាត់ដេរសមួយកន្លែងក្នុងភូមិសាស្ដ្រខណ្ឌដង្កោ។ ករណីអគ្គិភ័យនេះបានកើតឡើងកាលពីវេលាម៉ោង១១:៥០នាទីព្រឹក ថ្ងៃអង្គារ ទី២ ខែមករា ឆ្នាំ២០២៤ នៅចំណុចភូមិតាលី សង្កាត់ដង្កោ ខណ្ឌដង្កោ រាជធានីភ្នំពេញ។

យោងតាមរបាយការណ៍របស់ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា ទីតាំងដែលត្រូវបានអគ្គិភ័យឆាបឆេះធ្វើពីថ្ម ប្រកស័ង្កសី ទំហំ ៥០x១០០ម៉ែត្រ មានម្ចាស់ឈ្មោះ ឈិន ផាន់ ភេទប្រុស អាយុ៤៧ឆ្នាំ ជនជាតិខ្មែរ មុខរបរម្ចាស់រោងចក្រ។ ករណីនេះត្រូវបានកម្លាំងបង្ការ ពន្លត់អគ្គិភ័យ និងសង្គ្រោះការិយាល័យអគ្គិភ័យចេញរថយន្ដអន្តរាគមន៍ចំនួន៦គ្រឿង ប្រើប្រាស់ទឹកអស់ចំនួន៧ឡាន ស្មើរនឹង២៨ម៉ែត្រគូប ។

បើតាមរបាយការណ៍ ករណីអគ្គិភ័យនេះ ផ្ដើមចេញពីការឆ្លងកំដៅចេញពីឡដុតចំហាយបង្កជាអគ្គិភ័យ​​ ឆេះសំយ៉ាបដំបូលដែកប្រក់ស័ង្កសីទំហំ ០៥ម៉ែត្រx២០ម៉ែត្រ អស់មួយចំហៀងរួមទាំងម៉ូតូចំនួន៣០គ្រឿង និងឡដុតចំហាយចំនួន០១ឡ ហើយពុំបានឆេះរាលដាលដល់អ្នកក្បែរខាងឡើយ៕

អត្ថបទ៖ សុខា