ព័ត៌មានអន្ដរជាតិ

បំណុលរដ្ឋាភិបាលអាមេរិកឡើងខ្ពស់ដល់ចំណុចមិនធ្លាប់មានក្នុងប្រវត្តិសាស្រ្ត

បានផុស

១២ ខែ មុន

នៅ

ថ្ងៃពុធ ៣ មករា ២០២៤

ដោយ

បំណុលរដ្ឋាភិបាលអាមេរិកបានកើនដល់ចំណុចគួរកត់សម្គាល់គឺមានប្រមាណ ៣៤ លានលានដុលា្លរក្នុងប្រវត្តិសាស្រ្តរបស់ខ្លួន ដែលចំនួននេះគឺច្រើនគុណនឹងពីរ បើធៀបនឹងប្រទេសកូនបំណុលធំជាងគេលើលោកលំដាប់ទីពីរគឺប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រតនាគារសហរដ្ឋអាមេរិក បានបញ្ចេញនូវទិន្នន័យបំណុលកាលពីថ្ងៃអង្គារម្សិលមិញ ដែលបំណុលថ្មីរបស់ខ្លួនកើនដល់ ៣៤ លានលានដុល្លារអាមេរិក ពោលគឺកើនឡើងបន្ថែមជិត ១.៥ ពាន់លានដុល្លារគិតត្រឹមថ្ងៃទី២៩ ខែធ្នូ នៃឆ្នាំ២០២៣កន្លងទៅ ខណៈកម្ចីក៏នៅកើតមានបន្ថែមផងដែរ ដោយកើនដល់ ៩០ ពាន់លានដុល្លារនៅថ្ងៃដដែលនោះ ។

យោងតាមប្រភពមូលនិធិសារពើពន្ធឯករាជ្យអព្យាក្រឹត្យអាមេរិកមួយឈ្មោះ Peter G. Peterson Foundation បានចង្អុលបង្ហាញថា បំណុលសាធារណៈរបស់រដ្ឋាភិបាលរដ្ឋធានីវ៉ាស៊ីងតោន បើគិតជាទឹកប្រាក់គឺស្មើនឹង បុរស ស្រ្តី និងកុមារម្នាក់ៗនៅអាមេរិក មានបំណុលជាង ១០២,០០០ ដុល្លារអាមេរិក ឬប្រហែលនឹង ២៦ ម៉ឺនដុល្លារក្នុងមួយគ្រួសារ ខណៈបំណុលសហរដ្ឋអាមេរិកថ្មីនេះ គឺស្មើនឹងទំហំសេដ្ឋកិច្ចនៃប្រទេសចិន អាល្លឺម៉ង់ ជប៉ុន ឥណ្ឌា និងចក្រភពអង់គ្លេសបូកបញ្ចូលគ្នាទៅទៀត ។

“ពួកយើងកំពុងចាប់ផ្តើមឆ្នាំថ្មី ប៉ុន្តែបំណុលជាតិរបស់យើងនៅតែស្ថិតលើទិសដៅងាយរងគ្រោះ និងគ្មានភាពប្រាកដប្រជា។ បន្ថែមពីខ្ទង់បំណុលវាល់លានពីមួយឆ្នាំទៅមួយឆ្នាំ នេះក៏ជាសញ្ញាអាសន្នមួយដល់អ្នកធ្វើនយោបាយរបស់យើងដែលត្រូវគិតអំពីអនាគតប្រជាជាតិមួយនេះ”។ នេះបើតាមសម្តីលោក Michael Peterson ប្រធានប្រតិបត្តិនៃមូលនិធិខាងលើបានលើកឡើង ។

គួររំឭកដែរថា យោងតាមប្រភពមូលនិធិរូបិយវត្ថុអន្តរជាតិ IMF, បើប្រៀបធៀបទៅ គឺប្រទេសចិនមានបំណុលប្រមាណ១៤ លានលានដុល្លារអាមេរិក គិតត្រឹមឆ្នាំមុន ហើយបើធៀបនឹងបំណុលអាមេរិកគឺស្មើនឹង ទំហំទឹកប្រាក់នៃប្រទេសបំណុល ៥ ធំៗបូកបញ្ចូលគ្នា គឺចិន ជប៉ុន ចក្រភពអង់គ្លេស បារាំង និងអ៊ីតាលី ៕

ប្រែសម្រួល៖ មាន រតនា

ប្រភព៖ RT