ព័ត៌មានជាតិ

ឆ្នាំ ២០២៣ មានកម្មករជួបគ្រោះថ្នាក់ការងារ និងចរាចរណ៍ ជាង ១ ម៉ឺននាក់ ថយចុះ ៤%

បានផុស

១ year មុន

នៅ

ថ្ងៃព្រហស្បតិ៍ ៤ មករា ២០២៤

ដោយ

លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍នៅព្រឹកថ្ងៃទី ០៤ មករា នេះថា ឆ្នាំ ២០២៣ មានកម្មករជួបគ្រោះថ្នាក់ការងារ និងគ្រោះថ្នាក់ចរាចរណ៍ ចំនួន ១៣ ៤៧៤ ករណី ដោយមានជនរងគ្រោះសរុប ១៤ ៣១២ នាក់ ស្រី ៧ ៣៩៨ នាក់ បើធៀបទៅនឹងឆ្នាំមុនឃើញថា មានការថយចុះប្រមាណ ៤%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឆ្នាំ ២០២២ កន្លងទៅ មានករណីគ្រោះថ្នាក់ចរាចរណ៍កើតឡើងទៅលើកម្មករ-និយោជិត សរុបចំនួន ៥ ១៥៨ ករណី បណ្ដាលឲ្យរងគ្រោះចំនួន ៦ ០៥១ នាក់ ក្នុងនោះស្លាប់ចំនួន ១៥៦ នាក់ របួសធ្ងន់ចំនួន ១ ៦២៤ នាក់ និងរបួសស្រាលចំនួន ៤ ២៧១ នាក់។

មានកត្តាសំខាន់ ៣ ដែលជំរុញឲ្យមានករណីគ្រោះថ្នាក់ចរាចរណ៍កើតឡើង ក្នុងនោះរួមមាន កត្តាមនុស្ស យានយន្ត និងកត្តាផ្លូវ។ គ្រោះថ្នាក់ចរាចរណ៍ភាគច្រើនបង្កឡើងពីកត្តាមនុស្ស ដូចជាបើកបរលើសល្បឿនកំណត់ ការមិនគោរពសិទ្ធិអាទិភាព ការមិនប្រកាន់ស្តាំ មិនគោរពភ្លើង និងស្លាកសញ្ញាចរាចរណ៍ និងការបើកបរក្រោមឥទ្ធិពល នៃគ្រឿងស្រវឹង និងគ្រឿងញៀន។

លោក កត្តា អ៊ន បានបញ្ជាក់ថា គិតត្រឹមខែមិថុនា ឆ្នាំ ២០២៣ កម្ពុជា មានរោងចក្រសហគ្រាសចំនួន ១៧ ២៥១ រោងចក្រ និងមានកម្មករ-និយោជិត សរុបចំនួនជិត ១,៥ លាននាក់ ក្នុងនោះរោងចក្រសហគ្រាសក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប មានចំនួន ១ ៣៣២ រោងចក្រ មានកម្មករ-និយោជិត សរុបប្រមាណ ៨៤ ម៉ឺននាក់ ដោយទទួលបានប្រាក់ចំណូលប្រចាំឆ្នាំប្រមាណជិត ៣ ពាន់លានដុល្លារ៕

អត្ថបទ ៖ សំអឿន