មេក្រុមហេសបូឡា ត្រូវគេធ្វើឃាតនៅប្រទេស លីបង់

ការវាយប្រហារអាកាសដែលគេសង្ស័យជាស្នាដៃរបស់អ៊ីស្រាអែល បានផ្តាច់ជីវិតមេបញ្ជាការជាន់ខ្ពស់ក្រុមហេសបូឡា នៅភាគខាងត្បូងប្រទេសលីបង់ ដែលទង្វើនេះ បណ្តាលឲ្យភាពតានតឹងកើនឡើងមួយកម្រិតទៀត ខណៈអ៊ីស្រាអែល ក៏កំពុងតែធ្វើសង្គ្រាមជាមួយក្រុមហាម៉ាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីការិយាល័យប្រព័ន្ធផ្សព្វផ្សាយក្រុមហេសបូឡា, លោក Wissam al-Tawil អនុប្រធាននៃអង្គភាពបញ្ជាការសម្ងាត់ Radwan ត្រូវគេធ្វើឃាតកាលពីថ្ងៃចន្ទទី៨ខែមករារួមជាមួយ​យុទ្ធជន​ហេសបូឡា​ម្នាក់​ទៀត ខណៈពេលកំពុងជិះ​រថយន្ត​ស្ព័រ នៅ​ក្នុងទី​ក្រុង Majdal Selm ចម្ងាយជាង៦គីឡូម៉ែត្រ​ ភាគ​ខាងជើង​ព្រំដែន​អ៊ីស្រាអែល។

លោក Al-Tawil គឺជាសមាជិកជាន់ខ្ពស់បំផុតនៃក្រុមហេសបូឡា ដែលត្រូវគេសម្លាប់ ចាប់តាំងពីសង្គ្រាមរបស់អ៊ីស្រាអែលជាមួយក្រុមហាម៉ាស ផ្ទុះឡើងនៅថ្ងៃទី៧ខែតុលា ហើយការធ្វើឃាតនេះកើតឡើង បន្ទាប់ពីក្រុមហេសបូឡា បាញ់ស្រោចមីស៊ីលលើមូលដ្ឋានចារកម្មអ៊ីស្រាអែលកាលពីថ្ងៃសៅរ៍ ដើម្បីឆ្លើយតបទៅនឹងការវាយប្រហារដោយយន្តហោះគ្មានមនុស្សបើក សម្លាប់មេដឹកនាំរងក្រុមហាម៉ាសលោក Saleh al-Arouri និងមនុស្ស៦នាក់ទៀត នៅជាយក្រុងបេរូត។

កងកម្លាំងការពារអ៊ីស្រាអែល (IDF) ទទួលស្គាល់ថា កាលពីថ្ងៃចន្ទ ខ្លួនពិតជាបាញ់ប្រហារប្រឆាំងនឹងគោលដៅយោធារបស់ក្រុមហេសបូឡា ក្នុងប្រទេសលីបង់ ពិតមែនប៉ុន្តែមិនបញ្ជាក់ អំពីការធ្វើឃាតលោក al-Arouri និង al-Tawil ទេ។

ស្របពេលជាមួយគ្នានោះដែរ មន្ត្រីអាមេរិកបានទទូចថា ពួកគេកំពុងធ្វើការដើម្បីការពារសង្គ្រាមអ៊ីស្រាអែល-ហាម៉ាស មិនឲ្យរីកកាន់តែធំជាងនេះ ហើយចារកម្មអាមេរិកបានរកឃើញថា កងកម្លាំងអ៊ីស្រាអែល ច្បាស់ជាពិបាកសម្រេចជោគជ័យហើយ ចំពោះសង្គ្រាមពីរក្នុងពេលតែមួយបែបនេះ។ 

អង្គភាព Radwan របស់លោក Al-Tawil បានរៀបចំផែនការវាយប្រហារឆ្លងដែន ប្រឆាំងអ៊ីស្រាអែល ប៉ុន្តែផែនការទាំងនោះត្រូវគេរាយការណ៍ថា ផ្អាកវិញ នៅពេលចលនាសកម្មប្រយុទ្ធប៉ាឡេស្ទីន បើកការវាយឆ្មក់យ៉ាងភ្ញាក់ផ្អើលបំផុតលើភូមិភាគខាងត្បូងប្រទេសអ៊ីស្រាអែលកាលពីថ្ងៃទី៧ខែតុលា។

ទោះបីជាយ៉ាងណាក៏ដោយ រដ្ឋមន្ត្រីការពារជាតិអ៊ីស្រាអែល លោក Yoav Gallant បានប្រាប់កាសែត Wall Street Journal ថា ទីក្រុងហ្ស៊េរុយសាឡិមខាងលិច មិនខ្លាចធ្វើសង្រ្គាមជាមួយក្រុមហេសបូឡា និងហាម៉ាស ក្នុងពេលតែមួយនោះទេ៕

ប្រែសម្រួល៖ Vann Vann

ប្រភព៖ RT

ចុចអាន៖ ក្រុមហេសបូឡា គំរាមផ្ទុះសង្គ្រាមជាមួយ អ៊ីស្រាអែល