អ្នកវិទ្យាសាស្រ្ត រកឃើញវីរុសគ្រោះថ្នាក់ ក្នុងរូងភ្នំនៅប្រទេស ថៃ

ក្នុងកិច្ចប្រជុំរបស់អង្គការសុខភាពពិភពលោក កាលពីដើមសប្តាហ៍ អ្នកវិទ្យាសាស្រ្តមកពីអង្គការ EcoHealth Alliance បានបង្ហាញរបាយការណ៍អំពីការរកឃើញវីរុសគ្រោះថ្នាក់ កើតចេញពីសត្វប្រចៀវនៅក្នុងប្រទេសថៃ ដែលមានសមត្ថភាពចម្លងមកមនុស្ស ជាហេតុបង្កក្តីបារម្ភខ្លាំងមែនទែន។ នេះបើតាមការចុះផ្សាយរបស់សារព័ត៌មាន WION។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត Peter Daszak ប្រធានអង្គការខាងលើ បានបញ្ជាក់ថា ប្រភេទវីរុសដែលគេមិនធ្លាប់ជួបពីមុនមកនេះ គឺត្រូវបានរកឃើញនៅក្នុងរូងភ្នំនៅតំបន់ដាច់ស្រយាលនៃប្រទេសថៃ ហើយមេរោគបានលាក់ខ្លួនពួនអាត្មាក្នុងលាមកសត្វប្រចៀវ ដែលកសិករឧស្សាហ៍យកមកធ្វើជី។

លោក Daszak ប្រាប់ទៅអង្គប្រជុំរបស់ WHO ថា “យើងបានរកឃើញពពួកមេរោគស្រដៀងកូវីដជាច្រើននៅក្នុងរូងភ្នំ ប៉ុន្តែមានមេរោគមួយប្រភេទចម្លែកជាងគេ។ វាជាប្រភេទមេរោគចម្លងពីសត្វមកមនុស្ស ដែលកំពុងលាក់ខ្លួនក្នុងលាមកសត្វប្រចៀវ ហើយលាមកសត្វប្រចៀវគឺត្រូវបានមនុស្សយកមកប្រើធ្វើជី ហេតុដូច្នេះហើយ មានហានិភ័យថា មេរោគងាយនឹងផ្ទុះឡើងខ្លាំងណាស់”។ 

មកទល់ពេលនេះ អង្គការខាងលើ កំពុងយកមេរោគមកធ្វើតេស្ត ដើម្បីកំណត់ឲ្យបានជាក់លាក់ថាតើ វាអាចបង្កគ្រោះថ្នាក់ដល់មនុស្សខ្លាំងកម្រិតណា។

ទោះបីជាយ៉ាងណាក៏ដោយ របាយការណ៍នេះ មិនបានបញ្ជាក់ថាតើរូងភ្នំក្នុងប្រទេសថៃនោះ ស្ថិតក្នុងខេត្តណានោះទេ ហើយក៏មិនទាន់មានការស្រាយបំភ្លឺពីភាគីថៃទេ។

របកគំហើញនេះកើតឡើង ចំពេលករណីឆ្លងជំងឺកូវីដ១៩ជាសកល បានហក់ឡើងសាជាថ្មី ដោយការសម្រាកព្យាបាលនៅមន្ទីរពេទ្យកើនឡើង ៤២%នៅទូទាំង ៥០ ប្រទេស។

គេសន្មតថា ការជំរុញករណីឆ្លងនេះគឺបណ្តាលមកពីវីរុសកូវីដបំប្លែងខ្លួន JN.1 ដែលត្រូវបានរកឃើញដំបូងនៅប្រទេសបារាំងក្នុងខែកញ្ញា។ WHO បានចាត់ថ្នាក់ JN.1 ជាវីរុសបំប្លែងខ្លួនគួរឲ្យចាប់អារម្មណ៍រួចទៅហើយ ប៉ុន្តែអះអាងថា វាមិនអាចបង្កហានិភ័យខ្ពស់ដល់សុខភាពទេ៕ 

អត្ថបទ៖ សុខ សុវណ្ណ

ចុចអាន៖ អង់គ្លេស រកឃើញអ្នកផ្ទុកវីរុសគ្រោះថ្នាក់ ដែលឆ្លងតាមរយៈចៃឆ្កែ