មជ្ឈមណ្ឌលព្យាបាលកុមារ បេះដូងជប៉ុនថ្មីមួយទៀត គ្រោងនឹងសាងសង់នៅដើមខែមេសាខាងមុខ

មជ្ឈមណ្ឌលព្យាបាលកុមារ បេះដូងជប៉ុនថ្មីមួយទៀត ដែលផ្ដួចផ្ដើមបង្កើតឡើងដោយអង្គការបេះដូងជប៉ុន គ្រោងនឹងសាងសង់នៅថ្ងៃទី ១ ខែមេសា ឆ្នាំ ២០២៤ខាងមុខ ខណៈបច្ចុប្បន្ននៅខ្វះខាតថវិកាមួយចំនួន នៅឡើយ។

អ្នកស្រី រុន សុភាព ប្រធានរដ្ឋបាល នៃមជ្ឈមណ្ឌលព្យាបាលកុមារ បេះដូងជប៉ុន បានប្រាប់កម្ពុជាថ្មីថា​ បច្ចុប្បន្នបរិវេណដែលត្រូវសាងសង់មន្ទីពេទ្យនេះ កំពុងស្ថិតក្នុងដំណាក់កាលដំបូង គឺការចាក់បំពេញដីក្នុងស្រះ និងពង្រាបដីឱ្យមានសណ្ឋានស្មើល្អ។

អ្នកស្រី បន្ថែមថា មន្ទីរពេទ្យថ្មីនេះ នឹងផ្តល់ការព្យាបាលវេជ្ជសាស្ត្រទំនើប រួមទាំងការព្យាបាលជំងឺមហារីកដល់កុមារទាំងអស់ ដោយឥតគិតថ្លៃ។ ម៉្យាងទៀតវិញទៀត ការសាងសង់ មន្ទីរពេទ្យថ្មីនេះ គឺជាសមទ្ធិផលទី ២ ខណៈមន្ទីរពេទ្យដំបូង​​ បានបើកដំណើរការជាយូរមកហើយ មាន​ទីតំាង​នៅ​ក្នុង​មន្ទីរពេទ្យ​បង្អែក​ស្រុក​ពញាឭ ខេត្ត​កណ្តាល ជិត​ភ្នំ​ព្រះរាជទ្រព្យ​ ឬ​ភ្នំ​ឧត្តុង្គ។

អ្នកស្រី រុន សុភាព មានប្រសាសន៍បន្តថា មូលហេតុដែលមន្ទីរពេទ្យខ្វះខាតថវិកា ក៏ដោយសារតែមន្ទីរពេទ្យនេះ គឺជាមជ្ឃមណ្ឌលព្យាបាលកុមារ ទៅលើផ្នែកមហារីក និងជំងឺផ្សេងៗទៀត របស់កុមារ ដោយមិនគិតថ្លៃ និងមិនទទួលប្រាក់ពីអ្នកជំងឺ នោះឡើយ។

ជាអ្នកតំណាងមន្ទីរពេទ្យ អ្នកស្រី បានអំពាវនាដល់សប្បុរសជន និងក្រុមហ៊ុនផ្សេងទៀត ដែលមានបំណងជួយឩបត្ថម្ភគាំទ្រដល់ការកសាងមន្ទីរពេទ្យថ្មី សូមចូលរួមបរិច្ចាគជាថវិកា និងតាមសទ្ធារៀងៗខ្លួន ដើម្បីឱ្យមន្ទីរពេទ្យថ្មីមួយនេះ អាចបើកដំណើរការបាន ទៅដោយរលូនតាមគម្រោងដែលបានបង្កើត រួចជាស្រេច។

សូមជម្រាបជូនថា គម្រោងការសាងសង់មន្ទីពេទ្យ ថ្មីនេះ ជាការផ្ដួចផ្ដើមបង្កើតឡើងដោយ អង្គការបេះដូងជប៉ុន និងសប្បុរជនផ្សេងៗទៀត ហើយមន្ទីរពេទ្យ នឹងមានឈ្មោះថា «មជ្ឈមណ្ឌលព្យាបាលកុមារអាស៊ីបេះដូងជប៉ុន»។ ទីតាំងរបស់មន្ទីរពេទ្យ ថ្មីនេះ នឹងត្រូវសាងសង់ក្នុងបរិវេណមន្ទីរពេទ្យបង្អែកជ័យជំនះ ក្រុងតាខ្មៅ ខេត្តកណ្តាល៕

អត្ថបទ ៖ សួស សិត