តារាសម្តែងជើងចាស់ លោក ប៉ែន តារាវុទ្ធី ធ្លាក់ខ្លួនឈឺ គ្មានលុយទិញថ្នាំព្យាបាលជំងឺ

អតីតពិធីករវិទ្យុ FM98 និងជាតារាសម្តែងជើងចាស់ លោក ប៉ែន តារាវុទ្ធី បន្ទាប់ពីបាត់មុខពីសិល្បៈមួយរយៈ ស្រាប់តែថ្មីៗនេះមានដំណឹងថា កំពុងធ្លាក់ខ្លួនឈឺ គ្មានលុយទិញថ្នាំព្យាបាលជំងឺឡើយ ខណៈលោកក៏បានធ្វើការអំពាវនាវសុំការជួយឧបត្ថម្ភពីសប្បុរសជនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការបង្ហោះនៅលើបណ្តាញសង្គមហ្វេសប៊ុក លោក អ៊ឹម ជីវ៉ា បានរៀបរាប់ថា «ជួយ share ផង អាណិតណាស់ តារាសម្តែងជើងចាស់ និងជាអតីពិធីករវិទ្យុ FM 98 លោក ប៉ែន តារាវុទ្ធី ធ្លាក់ខ្លួនឈឺ គ្មានលុយទិញថ្នាំព្យាបាល ដាច់ចិត្តលើកដៃទាំងទឹកភ្នែកសុំលុយបងប្អូន Facebook ទិញថ្នាំព្យាបាលជំងឺ បានថវិការខ្លះយកមកដោះស្រាយជីវភាព»។

លោកបញ្ជាក់ថា តារាសម្តែងជើងចាស់ លោក ប៉ែន តារាវុទ្ធី បានធ្លាក់ខ្លួនឈឺ គ្មានលុយទិញថ្នាំ រហូតសម្រេចចិត្តមកដល់ផ្ទះ លោក ដើម្បីបានថវិការខ្លះព្យាបាលជំងឺ។ ក្នុងនោះ លោក ប៉ែន តារាវុទ្ធី និយាយថា ទម្រាំមកនេះ គឺលោកពិបាកពេក ពេលខ្លះគ្មានលុយទិញបាយហូបទេ ហើយឈឺក៏គ្មានលុយទិញថ្នាំលេប ទិញថ្នាំព្យាបាលជំងឺដែរ។ លោក ប៉ែន តារាវុទ្ធី ក៏បានស្នើជួយលោកផង ព្រោះក្រណាស់ អត់មានអ្នកណាជាទីពឹងទេ។

តារាសម្តែង អ៊ឹម ជីវ៉ា បានបន្ថែមថា «ពេលឮគាត់និយាយអ៊ីចឹង ខ្ញុំស្ទើរទប់ទឹកភ្នែកមិនជាប់ មិនគួរណាជាតិជាតារាល្បីពីមុន ធ្លាប់មានបាន បែរជាធ្លាក់មកដល់ចំណុចនេះសោះ អាណិតគាត់ណាស់»។

យ៉ាងណាមិញ បន្ទាប់ពីមានការបង្ហោះបែបនេះ គេឃើញមហាជន និងអ្នកគាំទ្រមួយចំនួន បានសម្តែងការអាណិតអាសូរ និងខ្លះទៀត ក៏បានចូលរួមឧបត្ថម្ភថវិកាជួយដល់​ លោក ប៉ែន តារាវុទ្ធី ផងដែរ៕

អត្ថបទ ៖ ចាន់រ៉ា