ព័ត៌មានជាតិ

កម្ពុជា មានគ្រឹះស្ថានមតេ្តយ្យសិក្សា បឋមសិក្សារដ្ឋ និងឯកជន ជាង ១ ម៉ឺនកន្លែង នៅទូទាំងប្រទេស

បានផុស

១ year មុន

នៅ

ថ្ងៃចន្ទ ២២ មករា ២០២៤

ដោយ

គិតត្រឹមឆ្នាំ ២០២៣ នេះ កម្ពុជា មានគ្រឹះស្ថានមតេ្តយ្យសិក្សា និងបឋមសិក្សារដ្ឋ និងឯកជន ជាង ១៣០០០ កន្លែង នៅទូទាំងប្រទេស ក្នុងនោះវិស័យឯកជនមានប្រមាណជិត ១៥០០ សាលា។

លោក កាន់ ពុទ្ធី អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍ថា ចំណោមគ្រឹះស្ថានមត្តេយ្យសិក្សា និងបឋមសិក្សា ទាំងរដ្ឋ និងឯកជន ទាំង ១៣៤៦១ សាលា ក្នុងនោះសាលាឯកជនមានចំនួន ១៤៨៩ សាលា មានសាលាមត្តេយ្យចំនួន ៧៦០ សាលា និងសាលាបឋមសិក្សាចំនួន ៧២៩ សាលា។ ចំណែកសាលាសាធារណៈវិញ មានចំនួន ១១៩៧២ សាលា មានសាលាមត្តេយ្យសិក្សាចំនួន ៤៦៣៤ សាលា មានសិស្សសរុបចំនួន ២៥៦,៦៥៧ នាក់ និងសាលាបឋមសិក្សាចំនួន ៧៣៣៨ សាលា ដោយមានសិស្សសរុបចំនួន ២,០៥៧,៦១២ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កាន់ ពុទ្ធី បានបន្តទៀតថា ការមានសាលាមតេ្តយ្យ និងសាលាបឋមសិក្សាទាំងរដ្ឋ និងឯកជន កាន់តែច្រើន នឹងជួយលើកកម្ពស់ដល់ការសិក្សារបស់កុមារតូចកាន់តែប្រសើរ ព្រោះថាការរៀននៅមតេ្តយ្យ ជួយគាំទ្រដល់គុណភាពអប់រំ ដោយជួយផ្សព្វផ្សាយដល់ឪពុកម្ដាយឱ្យបញ្ជូនកូនតាមពេលកំណត់ពីអាយុ ៣ ដល់ ៥ ឆ្នាំ បង្រៀនឱ្យចេះថែទាំកូនបានល្អ ដើម្បីពួកគាត់បានយល់ដឹងពីសារៈសំខាន់ នៃការរៀនសូត្រ។ ចំណែកកុមារ ក៏ទទួលបានផលពីការទៅរៀនថ្នាក់មតេ្តយ្យសិក្សា បានយល់ដឹងពីអនាម័យ ការស្អាត និងបណ្ដុះនូវបំណិនផ្សេងៗ និងការជួយគាំទ្រទាំងរាងកាយ ឥរិយាបថ និងសតិបញ្ញា មានភាពអង់អាចក្លាហាន និងទទួលបានចំណេះដឹងផ្នែករៀនដូចជាគិតលេខ ចេះគិត សីលធម៌វប្បធម៌ ចេះទំនាក់ទំនងជាមួយក្មេងផ្សេងៗ ទៀត៕

អត្ថបទ ៖ សំអឿន