អតីតប្រមុខការទូត លោក ប្រាក់ សុខុន បានឈរឈ្មោះជាបេក្ខជនសមាជិកព្រឹទ្ធសភា នៅភ្នំពេញ

អតីតប្រមុខការទូតកម្ពុជា លោក ប្រាក់ សុខុន ត្រូវបានថ្នាក់ដឹកនាំគណបក្សប្រជាជនកម្ពុជា សម្រេចចាត់តាំងឱ្យឈរឈ្មោះជាបេក្ខជនសមាជិកព្រឹទ្ធសភាសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៅខែកុម្ភៈ ខាងមុខនេះ។

ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥នេះ នឹងប្រព្រឹត្តទៅនៅថ្ងៃអាទិត្យ ទី២៥ ខែកុម្ភៈ ឆ្នាំ២០២៤ គឺជាការបោះ ឆ្នោតអសកល ដែលមានសមាជិកនៃរដ្ឋសភា និងសមាជិកក្រុមប្រឹក្សាឃុំ សង្កាត់ ក្នុងតំណែងជាអង្គបោះឆ្នោត។ គណបក្សនយោបាយចំនួន៤ បានចុះឈ្មោះ និងដាក់បេក្ខជនចូលរួមប្រកួតប្រជែងដណ្ដើមកៅអីសមាជិកព្រឹទ្ធសភានេះ ដែលក្នុងនោះ គណបក្សប្រជាជនកម្ពុជា ដែលជាគណបក្សកំពុងដឹកនាំរាជរដ្ឋាភិបាលបច្ចុប្បន្ន បានបន្តឈរឈ្មោះ និងដាក់បេក្ខជនសម្រាប់ការបោះឆ្នោតនេះនៅទូទាំង ៨ភូមិភាគ។

រាជធានីភ្នំពេញ ជាមណ្ឌលភូមិភាគទី១ ដែលមានអាសនៈចំនួន ៦ ត្រូវបានគណបក្សប្រជាជនកម្ពុជា សម្រេចចាត់តាំងលោក ប្រាក់ សុខុន សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងជាអតីតឧបនាយករដ្ឋមន្ត្រី រដ្ឋមន្ត្រីក្រសួងការបរទេស ឱ្យឈរឈ្មោះជាបេក្ខជនពេញសិទ្ធិលេខរៀងទី១ នៃភូមិភាគទី១ រាជធានីភ្នំពេញនេះ។ បច្ចុប្បន្ន លោក ប្រាក់ សុខុន មានតួនាទីជាសមាជិករដ្ឋសភា តំណាងរាស្រ្តមណ្ឌលខេត្តកណ្ដាល និងជាឧត្តមប្រឹក្សាផ្ទាល់ព្រះមហាក្សត្រនៃកម្ពុជា។

បើតាមបញ្ជីផ្លូវការបេក្ខជនឈរឈ្មោះបោះឆ្នោតជ្រើសតាំងសមាជិកព្រឹទ្ធសភា របស់គណបក្សប្រជាជនកម្ពុជា នៅភូមិភាគរាជធានីភ្នំពេញ ក្រៅពីលោក ប្រាក់ សុខុន ក៏មានបេក្ខជនពេញសិទ្ធិចំនួន៥រូបទៀត រួមមាន លោក ធន់ វឌ្ឍនា លោក ម៉ាន់ ឈឿន លោក ចែម វីឌ្យ៉ា (បច្ចុប្បន្នជារដ្ឋលេខាធិការក្រសួងការបរទេស) លោកស្រី ម៉ាណ ណាវី និងលោកស្រី មុំ សណ្ដាប់។ ដោយឡែក បេក្ខជនបម្រុងចំនួន៦រូប រួមមាន លោក ង៉ែត ចដ្តាវី លោក វ៉ា សុធា លោកស្រី កាន់ រតនៈឧប្បល លោក កែ ប៊ុនឡេង លោក សេង គួនណូ និងលោក ញិប ពិដោរ៕