ក្រសួងវប្បធម៌ ជួសជុល-អភិរក្សសំណង់វត្ថុបុរាណវត្ថុសិល្បៈ បានជាង ២ ពាន់មុខ

ក្រសួងវប្បធម៌ និងវិចិត្រសិល្បៈ បានឱ្យដឹងថា ឆ្នាំ២០២៣ ក្រសួងបានជួសជុល និងអភិរក្សសំណង់បុរាណវត្ថុបុរាណ វត្ថុសិល្បៈ និងវត្ថុជាតិពន្ធុសាស្ត្រ ប្រមាណជាង ២ ពាន់សំណង់ និងមុខ មានការកើនឡើងបើធៀបទៅនឹងឆ្នាំ២០២២ កន្លងទៅ។

ថ្លែងក្នុងពិធីបើក សន្និបាតបូកសរុបការងារវប្បធម៌ និងវិចិត្រសិល្បៈ ឆ្នាំ២០២៣ និងលើកទិសដៅការងារសម្រាប់ ឆ្នាំ២០២៤ នៅសាលសន្និសីទចតុមុខ នៅថ្ងៃទី២៤ ខែមករា នេះ លោក ហាប់ ទូច រដ្ឋលេខា ធិការប្រចាំការក្រសួងវប្បធម៌ និងវិចិត្រសិល្បៈ បានឱ្យដឹងថា ឆ្នាំ២០២៣ ក្រសួងបានជួសជុល និងអភិរក្សសំណង់បុរាណវត្ថុបុរាណវត្ថុសិល្បៈនិងវត្ថុជាតិពន្ធុសាស្ត្រ ចំនួន ២ ០៧៤ សំណង់ និងមុខ ក្នុងនោះជួសជុល និងអភិរក្សសំណង់បុរាណសរុបចំនួន ៣៧៤ សំណង់ លើសគោលដៅកំណត់ចំនួន ២០៣ សំណង់ បើធៀបទៅនឹង ឆ្នាំ២០២២ មានការ កើនឡើងចំនួន ៣២៦ សំណង់។

ជាមួយគ្នានេះដែរ ក្រសួងបានជួសជុល និងអភិរក្សវត្ថុបុរាណ/វត្ថុសិល្បៈ/វត្ថុជាតិពន្ធុសាស្ត្រសរុប ចំនួន ១ ៧០០ មុខ លើសគោលដៅកំណត់ចំនួន ១២៩ មុខ ដោយក្នុងនោះបាន ជួសជុលចំនួន ៣៦១ មុខ និងបានអភិរក្សក្រៅពីការជួសជុលចំនួន ១ ៣៣៩ មុខ ធៀបនឹងឆ្នាំ២០២២ គឺមានការថយចុះចំនួន ១ ៩៤៩ មុខ ដោយក្នុងនោះ វត្ថុបុរាណ វត្ថុសិល្បៈ/វត្ថុជាតិពន្ធុសាស្ត្រ ដែលបានជួសជុលបានថយចុះពី ៥៤០ មក ៣៦១ មុខ ចំណែកការអភិរក្សក្រៅពីការជួសជុលគឺថយចុះពី ៣១០៩ មក ១៣៣៩ មុខ។

បណ្ឌិតសភាចារ្យ គ្រឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានស្នើប្រធានអង្គភាព ប្រធានមន្ទីរ និងប្រធាន ក្រុមការងារពាក់ព័ន្ធ ត្រូវពិនិត្យភាពត្រឹមត្រូវ នៃតួលេខវឌ្ឍនភាពសូចនាករសមិទ្ធកម្មគន្លឹះទាំង៣ ដូចជាចំនួនសំណង់បុរាណវត្ថុបុរាណវត្ថុសិល្បៈ វត្ថុជាតិពន្ធុសាស្ត្រដែលទទួលបានការជួសជុល និងអភិរក្សក្នុង ឆ្នាំ២០២៣ និងទិសដៅឆ្នាំ២០២៤ រួមទាំងសកម្មភាពដើម្បីជំរុញបន្ថែម៕

អត្ថបទ៖ សំអឿន