​ពូជស្រូវ ផ្ការំដួលសុទ្ធ កើនទិន្នផល ១៥% ​កាត់បន្ថយការចំណាយពូជ ៣០ ភាគរយ និងលក់បានថ្លៃខ្ពស់

លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៤ ខែមករា ឆ្នាំ​២០២៤នេះ បានជួបប្រជុំជាមួយមន្រ្តីកសិកម្មឃុំ នៅឃុំសាកល្បង ក្នុងស្រុកជើងព្រៃ ខេត្តកំពង់ចាម ដើម្បីវាយតម្លៃលើការកសាងប្រព័ន្ធពូជស្រូវសុទ្ធផ្ការំដួល។

លោក យ៉ង សាំងកុមារ មានប្រសាសន៍ថា កាលពីឆ្នា២០២៣ មន្រ្តីកសិកម្មឃុំបានគាំទ្រកសិករចំនួន ២២២គ្រួសារ ឱ្យបានចូលរួមប្រើពូជសុទ្ធផ្ការំដួល។ ហើយថា តាមរយៈការចុះសិក្សាវាយតម្លៃ ជាមួយកសិករទាំងអស់ ការប្រើពូជសុទ្ធនាំមកនូវអត្ថប្រយោជន៍សំខាន់ៗ ដូចជា ការកើនផល ១៥ភាគរយ កាត់បន្ថយការប្រើពូជបានប្រមាណ ៣០ភាគរយ ងាយស្រួលលក់ និងបានតម្លៃខ្ពស់។

លោកបណ្ឌិត យ៉ង សាំងកុមារ បញ្ជាក់ថា នៅរដូវខាងមុខ ចំនួនកសិករប្រើពូជសុទ្ធទាំង ១០ឃុំ អាចកើនដល់ឡើង ១ ០០០​ គ្រួសារ។

តាមរយៈលទ្ធផល និងបទពិសោធនៅស្រុកជើងព្រៃ ក្រសួងកសិកម្ម រុក្ខាប្រមាញ់ និងនេសាទ នឹងបង្កើនការជំរុញការប្រើពូជសុទ្ធឲ្យបានទូលំទូលាយ​ទូទាំងប្រទេស តាមរយៈមន្រ្តីកសិកម្មឃុំ ដែលទើបជ្រើសរើសបានចំនួន ២៥០រូប និងជ្រើស​រើសបន្ថែម ៨០០​រូបទៀត នៅក្នុងឆ្នាំ២០២៤នេះ៕