ក្មេងស្រី អាមេរិក វ័យទើប ១០ ឆ្នាំគំរាមបាញ់សម្លាប់មិត្តរួមថ្នាក់

ក្មេងស្រីអាមេរិកអាយុ ១០ ឆ្នាំម្នាក់កំពុងប្រឈមមុខនឹងការចោទប្រកាន់ព្រហ្មទណ្ឌនៅរដ្ឋ South Carolina បន្ទាប់ពីនាងចង់យកកាំភ្លើងទៅសាលារៀន ដើម្បីបាញ់សម្លាប់មិត្តរួមថ្នាក់ ខណៈហេតុការណ៍នេះបានកើតឡើងនៅសាលាបឋមសិក្សា Kensington ក្នុងទីក្រុង Georgetown រដ្ឋ South Carolina សហរដ្ឋអាមេរិក ។​នេះបើយោងតាមការចេញផ្សាយរបស់សារពត៌មាន​ BBC កាលពីថ្ងៃទី​២៥ ខែមករា ។

ប៉ូលីសនៅក្នុងតំបន់ Georgetown ក្រោយមកបានចុះឆែកឆេរផ្ទះរបស់កុមារនោះ ហើយបានរកឃើញអាវុធដែលត្រូវបានលាក់ទុក ។ កុមារនេះ​ត្រូវ​បាន​ចោទ​ប្រកាន់​ដោយ​ដីកា​កោះ​ហៅ​​ពី​បទ​គំរាម​កំហែង​សិស្ស ហើយប្រឈមមុខនឹងការពិន័យពីសាលាចំពោះហេតុការណ៍នេះផងដែរ ។

នៅក្នុងហេតុការណ៍ដាច់ដោយឡែកមួយដែលបានរាយការណ៍នៅតំបន់ដូចគ្នាកាលពីថ្ងៃព្រហស្បតិ៍ ប៉ូលិសបាននិយាយថា មានក្មេងស្រីអាយុ ១១ ឆ្នាំនៅសាលាបឋមសិក្សាមួយផ្សេងទៀតត្រូវបានចោទប្រកាន់ក្នុងករណីស្រដៀងនេះផងដែរ បន្ទាប់ពីនាង​ចង់​បាញ់គំរាមសិស្សរួមថ្នាក់ បន្ទាប់​ពី​មាន​ជម្លោះ​ជាមួយ​សិស្ស​ម្នាក់ទៀត ។

ចំណែកឯនៅទីក្រុង Tahoka រដ្ឋតិចសាស់ កាលពីដើមសប្តាហ៍នេះ ក្មេងស្រីអាយុ ១៣ ឆ្នាំម្នាក់ក៏ត្រូវបានចាប់ខ្លួន និងចោទប្រកាន់ពីបទគំរាមប្រើអាវុធ ខណៈថ្នាក់រៀនត្រូវបានផ្អាកជាបណ្តោះអាសន្ន ដើម្បីស៊ើបអង្កេត ។

គួរបញ្ជាក់ថា កុមារដែលប្រើប្រាស់អាវុធដើម្បីគំរាមកំហែងដល់អ្នកដទៃបានកើនឡើងគួរឲ្យកត់សម្គាល់នៅសហរដ្ឋអាមេរិក ខណៈហេតុការណ៍នៅរដ្ឋ South Carolina នេះគឺជាករណីចុងក្រោយបង្អស់ពាក់ព័ន្ធនឹងកុមារដែលប្រឈមមុខនឹងការចោទប្រកាន់ពីបទគំរាមកំហែងធ្វើបាបសិស្ស ឬបុគ្គលិកសាលា ៕

អត្ថបទ៖ ប៊ុន សុភាព