​សមត្ថកិច្ចដុតកម្ទេចសាច់បង្កក​ ៤ កុងតឺន័រ ដែលនាំចូលខុសច្បាប់ ​នៅខេត្តស្វាយរៀង

​សាច់បង្កកចំនួន ៤ កុងតឺន័រ ដែលសមត្ថកិច្ចចាប់បាន​នៅក្រុងស្វាយរៀង ខេត្តស្វាយរៀង កាលពីពេលថ្មីៗ ​ត្រូវបានក្រុមមន្ត្រីជំនាញ​យកទៅត្រៀមដុតកម្ទេចចោលនៅថ្ងៃ ៤ ខែកុម្ភៈ ឆ្នាំ ២០២៤ នៅភូមិចូងព្រែក សង្កាត់ស្វាយរៀង ក្រុងស្វាយរៀង។​

​សូមរឭកថា រថយន្តកុងតឺន័រចំនួន៤គ្រឿង ដឹកជើងមាន់បង្កក តាមច្រកព្រំដែនខេត្តស្វាយរៀង ហើយ​បានបើកបរតាមផ្លូវវាង ចូលមកស្រុករមាសហែក ចូលមកក្រុងស្វាយរៀង​ត្រូវបាន​សមត្ថកិច្ច​ចាប់បាន ​កាលពីល្ងាចថ្ងៃទី ៣១ ​ខែមករា ឆ្នាំ ២០២៤ ស្ថិតនៅ​លើផ្លូវជាតិលេខ១៣។

ក្រោយពីមន្ត្រីជំនាញ ឃាត់រថយន្តកុងតឺន័រទាំង៤គ្រឿងនេះ និងមានការសម្របសម្រួលពីលោក ខាំ សុផារី ព្រះរាជអាជ្ញាអមសាលាដំបូងខេត្ត បានសម្រេចបើកទូរកុងតឺន័រ ដោយបានរកឃើញជើងមាន់​បង្កកជាច្រើនពាន់កេះ៕

អត្ថបទ៖ ភក្ដី