កិច្ចចរចាសន្តិភាពរវាងរដ្ឋាភិបាលថៃ និងក្រុមផ្ដាច់ខ្លួន​ Barisan Revolusi Nasional ចាប់ផ្ដើមកើតឡើងម្ដងទៀត

អស់រយៈពេល ២០ឆ្នាំមកហើយ ចាប់តាំងពីឆ្នាំ ២០០៤ មក ដែលតំបន់ភាគខាងត្បូងប្រទេសថៃ ត្រូវបានរងនូវជម្លោះកម្រិតទាប ដែលបង្កឡើងដោយក្រុមសកម្មប្រយុទ្ធផ្ដាច់ខ្លួន​ Barisan Revolusi Nasional ។ ហើយជម្លោះ រយៈពេលពីរទស្សវត្សរ៍មកនេះ បានបណ្ដាលឱ្យមានមនុស្សជាង ៧,៣០០ នាក់ស្លាប់ និង ១៣,៥០០ នាក់របួស ។

យ៉ាងណាមិញ នៅថ្ងៃអង្គារ ទី៦ ខែកុម្ភៈនេះ កិច្ចចរចាសន្តិភាព ជាមួយក្រុមផ្ដាច់ខ្លួន​ Barisan Revolusi Nasional បានចាប់ផ្ដើមកើតឡើងម្ដងទៀត បន្ទាប់ពីសម្រាករយៈពេល១ឆ្នាំ ដែលការចរចានេះ បានធ្វើឡើងនៅទីក្រុងកូឡាឡាំពួ ប្រទេសម៉ាឡេស៊ី ។

លោក Chatchai Bangchuad ប្រធានអ្នកចរចាថ្មីរបស់រដ្ឋាភិបាលថៃបាននិយាយថា កិច្ចប្រជុំនេះនឹងផ្តោតលើអ្វីដែលជាគោលដៅផែនការរួម នឹងបង្ហាញផ្លូវទៅរកសន្តិភាព ។

សូមបញ្ជាក់ថា Barisan Revolusi Nasional គឺជាក្រុមចលនាឯករាជ្យនៅភាគខាងជើងនៃប្រទេសម៉ាឡេស៊ី មាននៅរដ្ឋ Perlis , Kedah,​ Kelantan និងភាគខាងត្បូងប្រទេសថៃ តំបន់ Patani ។ សកម្មភាពបេះបោរ បានកើតឡើងនៅឆ្នាំ ២០០៤ និងបានជះឥទ្ធិពលទៅកាន់ទីក្រុងបាងកក និងខេត្តភូកេត ហើយវានៅបន្តរ៉ាំរ៉ៃហូតដល់ពេលបច្ចុប្បន្ន ៕

ប្រែសម្រួលដោយ៖ ប៉ោ កុសល
ប្រភព៖ The Star