កម្ពុជាផ្ដើមធ្លាក់ភ្លៀងកក់ខែនារដូវប្រាំងឆ្នាំនេះ ក្រោយខកខានយូរថ្ងៃ

ក្រសួងធនធានទឹក និងឧតុនិយមបានប្រកាសនៅថ្ងៃទី០៧ ខែកុម្ភៈនេះថា កម្ពុជាអាចនឹង​មាន​ភ្លៀងធ្លាក់កក់ខែក្នុងបរិមាណពី ១០ ទៅ ២០ ភាគរយ លាយលំដោយផ្គររន្ទះ និងខ្យល់កន្ត្រាក់ នៅខេត្តកោះ​កុ​ង និងខេត្តព្រះសីហនុចាប់ពីថ្ងៃទី ៧ ដល់ថ្ងៃទី ៩ ខែកុម្ភៈ ឆ្នាំ ២០២៤។

កន្លងមក ក្រសួងបានប្រកាសថា ចាប់ពីខែកុម្ភៈ​ដល់ដើមខែឧសភា ឆ្នាំ ២០២៤ សីតុណ្ហភាព​អាចនឹងកើនឡើងដល់ ៤១អង្សាសេ។

សូមជម្រាបថា រដូវប្រាំងឆ្នាំនេះ ចាប់ផ្តើម​ពីខែធ្នូ ឆ្នាំ២០២៣ ដល់​ដើមខែឧសភាឆ្នាំ ២០២៤ ដោយក្រសួងកត់សម្គាល់ថា នឹងមាន​ភ្លៀង​ធ្លាក់តិចជាងមុន​ ប៉ុន្តែមានផ្គរ និងរន្ទះកើន​ឡើង​ ជាមួយនឹងខ្យល់បក់ខ្លាំងនៅ​ក្នុង​ខែមេសា និងខែ​ឧសភា បើធៀបនឹងឆ្នាំ២០២៣៕