ព័ត៌មានជាតិ

សហគមន៍បឹងកាឆាងរៀបចំបន្ថែមគោលដៅទាក់ទាញទេសចរ គ្រោងសម្រេចនៅចុងឆ្នាំ២០២៤

បានផុស

១ year មុន

នៅ

ថ្ងៃព្រហស្បតិ៍ ៨ កុម្ភៈ ២០២៤

ដោយ

ដើម្បីរួមចំណែកទាក់ទាញភ្ញៀវទេសចរជាតិ-អន្តរជាតិ ឲ្យចូលមកទស្សនាសហគមន៍បឹងកាឆាងកាន់តែច្រើនបន្ថែមទៀត សហគមន៍បឹងកាឆាងកំពុងរៀបចំទីតាំងសំដៅអាចស្រូបទាញទេសចរនាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់«កម្ពុជាថ្មី» លោកស្រី អ៊ី រីនូ គណៈកម្មាធិការការពារសហគមន៍បឹងកាឆាងបានឲ្យដឹងថា បច្ចុប្បន្នសហគមន៍បឹងកាឆាង កំពុងរៀបចំប៉មដើម្បីមើលត្រីផ្សោត កន្លែងស្ទូចត្រី និងស្ពានយោល ព្រមទាំងកញ្ចុះអង្គុយចាក់បេតុងនៅក្រោមដើមកោងកាង គួបផ្សំសេវាកម្មដឹកភ្ញៀវទេសចរនិងធ្វើម្ហូបអាហារបម្រើភ្ញៀវនៅលើទូកជាដើម។

ពាក់ព័ន្ធទៅនឹងគម្រោងកែប្រែសហគមន៍បឹងកាឆាង លោកស្រីបានបញ្ជាក់យ៉ាងដូច្នេះថា «បច្ចុប្បន្នសម្រេចបានប្រមាណជាង ៦០% ឬអាចនិយាយបានថានៅតែ ៤០% ទៀតប៉ុណ្ណោះនឹងឈានសម្រេចជាស្ថាពរ»។

ក្នុងនាមសហគមន៍ លោកស្រីអះអាងថានឹងខិតខំព្យាយាមធ្វើយ៉ាងណាស្វែងរកដៃគូសហការដើម្បីឲ្យគម្រោងកែច្នៃនេះសម្រេចតាមផែនការ។

ដោយរំពឹងទុកថាការកែប្រែតំបន់សហគមន៍ការពារធនធានធម្មជាតិបឹងកាឆាង នឹងរួមចំណែកទាក់ទាញភ្ញៀវទេសចរឲ្យបានច្រើនកុះករ ខណៈសហគមន៍បឹងកាឆាងមានកន្លែងជាគោលដៅកម្សាន្តជាច្រើនមានដូចជា ព្រៃកោងកាង ឆ្នេរសមុទ្រ ត្រី ស្វា សត្វផ្សោត។ មួយទៀត នៅបឹងកាឆាងមានសេវាកម្មដឹកភ្ញៀវទេសចរដើរលេងកម្សាន្តដូចជា ទៅលេងឆ្នេរសមុទ្រ មើលត្រីផ្សោត ស្ទូចត្រីជាដើម។ ជាងនេះទៀត គឺអាហារសមុទ្រស្រស់ៗដែលលើកយកមកពីសមុទ្រថ្មីៗគ្មានសាធាតុគីមី។

ខណៈគម្រោងអភិវឌ្ឍសហគមន៍ការពារធនធានធម្មជាតិបឹងកាឆាង តាមផែនការនឹងសម្រេចនៅពាក់កណ្ដាលឆ្នាំ២០២៤ ឬចុងឆ្នាំ២០២៤ បើតាមលោកស្រី អ៊ី រីនូ ការសម្រេចទៅបានក៏ទាមទារឲ្យមានការជួយជ្រោមជ្រែងពីថ្នាក់ដឹកនាំទាំងថ្នាក់ខេត្ត និងថ្នាក់ជាតិ។

គួរជម្រាបថា សហគមន៍ការពារធនធានបឹងកាឆាង មានទីតាំងស្ថិតក្នុងដែនជម្រកសត្វព្រៃពាមក្រសោប ក្នុងភូមិបឹងកាឆាង ឃុំបាក់ខ្លង ស្រុកមណ្ឌលសីមា ខេត្តកោះកុង។ សហគមន៍នេះមានផ្ទៃដីសរុបចំនួន ៧២៨ហិកតា សម្បូរទៅដោយសក្ដានុពលជាច្រើនសម្រាប់បម្រើដល់វិស័យទេសចរណ៍៕