ស្នងការរាជធានី នឹងមានវិធានការបែបណាបើស្ត្រីឈ្មោះ គង់ ម៉ូលីកា មិនចូលខ្លួនបំភ្លឺតាមការអំពាវនាវ

រហូតមកដល់ថ្ងៃទី៧កុម្ភៈ ស្ត្រីឈ្មោះ គង់ ម៉ូលីកា ដែលបង្ហោះសារចោទប្រកាន់មន្ត្រីប៉ូលីសចរាចរណ៍ និងជនស៊ីវិលនៅចំណុចគោលដៅស្តុបក្ដាន់ពីរ មិនទាន់បានចូលខ្លួនមកបំភ្លឺជូនសមត្ថកិច្ចនៅឡើយ បើទោះបីមានការអំពាវនាវយ៉ាងទទូចពីសំណាក់លោកឧត្ដមសេនីយ៍ឯក ជូន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញយ៉ាងណាក៏ដោយ។

តើស្នងការដ្ឋាននគរបាលរាជធានីភ្នំពេញ នឹងមានវិធានការបែបណាចំពោះស្ត្រីរូបនេះ បើនៅតែមិនព្រមចូលខ្លួនមកបំភ្លឺជូនសមត្ថកិច្ច និងមហាជន?

លោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានប្រាប់ កម្ពុជាថ្មី កាលពីរសៀលថ្ងៃទី៧ ខែកុម្ភៈ ឆ្នាំ២០២៤ថា ករណីនេះបើសិនជាស្ត្រីឈ្មោះ គង់ ម៉ុលីកា មិនព្រមចូលខ្លួនមកដាក់ពាក្យបណ្ដឹង ឬមិនចូលខ្លួនមកបំភ្លឺចំពោះមុខសមត្ថកិច្ចនោះទេ ស្នងការនគរបាលរាជធានីភ្នំពេញ នឹងធ្វើកិច្ចការងារនេះដើម្បីបំភ្លឺជូនមហា​ជន​អំពីការផ្សព្វផ្សាយចោទប្រកាន់មកលើមន្ត្រីនគរបាលចរាចរណ៍។

បើតាមលោកឧត្ដមសេនីយ៍ឯក ជូន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ កាលពីព្រលប់ថ្ងៃទី៧ កុម្ភៈ បានលើកឡើងនៅក្នុងហ្វេសប៊ុកផេកផ្លូវការរបស់លោកថា ស្ត្រីឈ្មោះ គង់ ម៉ូលីកា មិនមែនជាតួអង្គក្នុងរឿងនេះទេ ក្នុងនោះ លោកក៏ស្នើសុំឲ្យអ្នកនិពន្ធចេញមកសារភាពឲ្យទាន់ពេលវេលា ព្រោះលោកក៏ត្រូវការរកយុត្តិធម៌ និងកិត្តិយស់ឲ្យអ្នករងគ្រោះពិតប្រាកដដែរ៕

អត្ថបទ៖ សុខុម