រដ្ឋ នឹងបញ្ចប់ការប៉ុនប៉ងធ្វើបដិវត្តន៍ដីធ្លី តាមរយៈការប្រើមនុស្ស វាស់វែង និងចេញបណ្ណកម្មសិទ្ធិជូនពលរដ្ឋ

រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ បានគូសបញ្ជាក់ថា រាជរដ្ឋាភិបាល  នឹងបញ្ចប់ការប៉ុនប៉ងធ្វើបដិវត្តន៍ដីធ្លីនៅកម្ពុជា តាមរយៈការប្រើប្រាស់កម្លាំងសរុបទូទាំងប្រទេស ដើម្បីវាស់វែង និងចេញបណ្ណកម្មសិទ្ធិដីធ្លីជូនប្រជាពលរដ្ឋ។ លោកឧបនាយករដ្ឋមន្ត្រីបានបញ្ជាក់បែបនេះ នៅក្នុងកិច្ចប្រជុំគណៈកម្មការសុរិយោដី និងអាជ្ញាធរជាតិដោះស្រាយទំនាស់ដីធ្លី នាថ្ងៃទី០៧ ខែកុម្ភៈ។

លោក សាយ សំអាល់ បានចាត់ទុកការចុះបញ្ជីដីធ្លី គឺជាកិច្ចការប្រវត្តិសាស្ត្រមួយក្នុងការបន្តធ្វើកំណែទម្រង់ដីធ្លីរបស់កម្ពុជា បង្កើតបរិយាកាសគ្មានវិវាទ ក្នុងគោលដៅគ្រប់គ្រង និងអភិវឌ្ឍន៍វិស័យដីធ្លី ឱ្យបានត្រឹមត្រូវ និងកាន់តែមានប្រសិទ្ធភាព។

លោក សាយ សំអាល់ បានអះអាងថា អ្វីដែលរាជរដ្ឋាភិបាលបាននិងកំពុងអនុវត្តន៍នាពេលនេះ គឺសំដៅបញ្ចប់ការចុះបញ្ជីដីធ្លីឱ្យបានមុនឆ្នាំ២០២៩ ដែលជាគម្រប់ខួបលើកទី៤០ នៃការចេញបណ្ណកម្មសិទ្ធិដីធ្លីជូនប្រជាពលរដ្ឋ។

តាមលោក សាយ សំអាល់  មកទល់ពេលនេះ ក្រសួងរៀបចំដែនដី នគរូបនីយកម្ម និងសំណង់ បានប្រគល់បណ្ណកម្មសិទ្ធិដីធ្លីប្រមាណ ៥ លានបណ្ណជូនប្រជាពលរដ្ឋរួចហើយ ខណៈនៅមានប្រមាណ ២ លានបណ្ណដែលកំពុងតែចែកជូនប្រជាពលរដ្ឋជារៀងរាល់ថ្ងៃ។ ដោយឡែកចំពោះផ្ទៃដីដែលមិនទាន់បានវាស់វែងនៅទូទាំងប្រទេស គឺនៅសល់ប្រមាណជា ៥ លានក្បាលដីទៀតដែលត្រូវវាស់វែង និងចុះបញ្ជីឱ្យបានចប់សព្វគ្រប់។

ជាការកត់សម្គាល់ ការវាស់វែង និងចេញបណ្ណកម្មសិទ្ធិដីធ្លី ដែលជាកំណប់ទ្រព្យរបស់ប្រជាពលរដ្ឋនោះ គឺទទួលបានការសាទរជាច្រើននៅលើបណ្តាញសង្គម។ ជុំវិញការទទួលបានការសារទរបែបនេះ សម្រាប់រាជរដ្ឋាភិបាល​គឺបានវាយតម្លៃថាជាជោគជ័យដ៏សំខាន់មួយ៕