ត្រឹមមួយខែមករា ថៃ ទាញទេសចរបរទេសបានជិត ៤ លាននាក់

អ្នកនាំពាក្យរដ្ឋាភិបាលថៃ លោក Chai Wacharonke បាននិយាយកាលពីពេលថ្មីៗនេះថា ឧស្សាហកម្មទេសចរណ៍របស់ប្រទេសថៃបានចាប់ផ្ដើមបញ្ចេញពន្លឺល្អវិញហើយសម្រាប់ឆ្នាំ ២០២៤ នេះ ខណៈត្រឹមតែមួយខែមករា ថៃទាញទេសចរបរទេសបានជិត ៤ លាននាក់ ។ នេះបើយោងតាមការចេញផ្សាយដោយសារព័ត៌មាន The Nation កាលពីថ្ងៃទី១១ ខែកុម្ភៈកន្លងទៅនេះ ។

លោក Chai បានលើកឡើងថា កត្តាដែលរួមចំណែកដល់ការកើនឡើងយ៉ាងគំហុកនៃអ្នកទេសចរធ្វើដំណើរមកលេងកម្សាន្តនៅក្នុងប្រទេសថៃ អាចមកពីតម្រូវការហោះហើររបស់អ្នកទេសចរ បន្ទាប់ពីចិនដកការរឹតត្បិតពាក់ព័ន្ធជំងឺរាតត្បាត និងគោលនយោបាយឥតគិតថ្លៃវីសារបស់រដ្ឋាភិបាលថៃ ។

ចំណែនៅមុនថ្ងៃបុណ្យចូលឆ្នាំថ្មីប្រពៃណីចិនចំនួន ២ ថ្ងៃ ពោលគិតត្រឹមថ្ងៃទី៨ ខែកុម្ភៈ ប្រទេសថៃបានស្វាគមន៍ភ្ញៀវបរទេសជិត ១៣ ម៉ឺននាក់ ក្នុងនោះភ្ញៀវចិនឈរនៅលំដាប់កំពូលគេមានចំនួន ៧៣០,៧៤៧ នាក់ បន្ទាប់មកគឺទេសចរម៉ាឡេស៊ីមាន ៤១៩,១១៦ នាក់, រុស្ស៊ីមានចំនួន ២៧៥,៦៤១ នាក់, ឥណ្ឌា ២០៩,៤៣១ នាក់ និងឡាវមានចំនួន ១៣០,៥៥១ នាក់ ។

ទន្ទឹមនោះ ក្រៅពីទាក់ទាញភ្ញៀវទេសចរមកពីប្រទេសចិន រដ្ឋាភិបាលថៃក៏បាននិងកំពុងកសាងទំនាក់ទំនងវិជ្ជមានជាមួយសមាជិកអាស៊ាន ដើម្បីលើកកម្ពស់ទេសចរណ៍ទៅវិញទៅមកនៅក្នុងតំបន់ ខណៈគំនិតផ្តួចផ្តើមមួយក្នុងចំណោមគំនិតផ្តួចផ្តើមគួរឲ្យកត់សម្គាល់ គឺគម្រោង “One Destination” ដែលមានមុខព្រួញលើកកម្ពស់វិស័យទេសចរណ៍នៅក្នុងប្រទេសចំនួន ៦ ក្នុងចំណោមប្រជាពលរដ្ឋក្នុងតំបន់ ក៏ដូចជាភ្ញៀវទេសចរណ៍ពិភពលោក ដោយក្នុងនោះមានការចូលរួមពីប្រទេសថៃ កម្ពុជា ម៉ាឡេស៊ី វៀតណាម ឡាវ និងមីយ៉ាន់ម៉ា ។

គួរបញ្ជាក់ថា កាលពីឆ្នាំ ២០២៣ ប្រទេសថៃបានឈានដល់គោលដៅទេសចរណ៍ចំនួន ២៨ លាននាក់ ដោយបង្កើតប្រាក់ចំណូលបាន ១.២ ពាន់ពាន់លានបាត (៣៤.៩៣ ពាន់លានដុល្លារ) ស្របពេលមុខព្រួញសម្រាប់ឆ្នាំ ២០២៤ នេះវិញ រដ្ឋាភិបាលបានកំណត់ទិសដៅការមកលេងកម្សាន្តរបស់អ្នកទេសចរជាង ៣៤ លាននាក់ ៕

ដោយ ៖ សុខ ជីវ័ន្ត

ចុចអាន ៖ ទិន្នន័យបង្ហាញថា ចំនួនប្រជាជន ថៃ ថយចុះ