ឥណ្ឌូណេស៊ី ចាប់ផ្តើមការបោះឆ្នោតធំបំផុតរបស់ពិភពលោក

តាមសេចក្តីរាយការណ៍របស់ Reuters, ប្រជាជនឥណ្ឌូណេស៊ីរាប់លាននាក់ ចាប់ផ្តើមធ្វើដំណើរទៅកាន់ការិយាល័យបោះឆ្នោត ដើម្បីជ្រើសរើសតំណាងនៅក្នុងសភា និងប្រធានាធិបតី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ត្បិតលោក Joko Widodo ត្រូវលាលែងតំណែងក្រោយចាយពេលគ្រប់គ្រង១០ឆ្នាំក៏ពិតមែន ប៉ុន្តែគេមើលឃើញថា គាត់នៅតែមានឥទ្ធិពលក្នុងនយោបាយរបស់ឥណ្ឌូណេស៊ី ព្រោះថាមានសម្ព័ន្ធមិត្តរបស់គាត់កំពុងឈរឈ្មោះប្រជែង ជាពិសេសកូនប្រុសរបស់គាត់ដែលឈរឈ្មោះជាអនុប្រធានាធិបតី។

នេះត្រូវបានគេមើលឃើញថា ជាការបោះឆ្នោតប្រព្រឹត្តទៅតែមួយថ្ងៃ មានទំហំធំបំផុតរបស់ពិភពលោក ព្រោះថាប្រជាជនឥណ្ឌូណេស៊ី មានសិទ្ធិបោះឆ្នោតមានរហូតដល់ទៅប្រហែល២០៥លាននាក់។

អ្នកបោះឆ្នោត មិនមែនត្រឹមជ្រើសរើសតែប្រធានាធិបតីនិងអនុប្រធានាធិបតីប៉ុណ្ណោះទេ ប៉ុន្តែក៏ត្រូវជ្រើសរើសសមាជិកសភាចំនួន៥៨០រូប និងតំណាងរាស្រ្តប្រចាំតំបន់ជាង២០០០០នាក់ផងដែរ។

ការិយាល័យបោះឆ្នោតជាង ៨០០០០០កន្លែង ចាប់ផ្តើមបើកទ្វារទូទាំងប្រទេសប្រជុំកោះមួយនេះ ហើយក្នុងការបោះឆ្នោត មានបេក្ខជនជិត២៦០០០០នាក់បានចុះឈ្មោះ និងមានគណបក្សនយោបាយចំនួន១៨ចូលរួមប្រកួតប្រជែង។

ទោះបីជាយ៉ាងណាក៏ដោយ មានបេក្ខជនឈានមុខតែ៣នាក់ប៉ុណ្ណោះ ដែលគេមើលឃើញថា កំពុងប្រកួតគ្នាយ៉ាងស្វិតស្វាញ។

១. លោក Prabowo Subianto អាយុ៧២ឆ្នាំ៖ តាមការស្ទង់មតិ គាត់កំពុងនាំមុខគូប្រជែង ដោយសារតែគោលនយោបាយម៉ឹងម៉ាត់។ គាត់សន្យាថា នឹងបន្តគោលនយោបាយរបស់លោក Jokowi។

២. លោក Ganjar Pranowo អាយុ៥៥ឆ្នាំ៖ គាត់​ជា​អតីត​អភិបាលខេត្ត​ជ្វា​កណ្តាល ​ពីរ​សម័យកាល។

៣. លោក Anie Baswedan អាយុ៥៤ឆ្នាំ៖ គឺជាអតីតរដ្ឋមន្ត្រីក្រសួងអប់រំ និងជាអភិបាលក្រុង ហ្សាការតា។

សូមបញ្ជាក់ថា លទ្ធផលបឋម នឹងត្រូវប្រកាសនៅយប់នៃថ្ងៃបោះឆ្នោតនេះ តែម្តង៕

អត្ថបទ៖ សុខ សុវណ្ណ

ចុចអាន៖ កូនប្រុសប្រធានាធិបតី ឥណ្ឌូណេស៊ី រងពាក្យនិន្ទាឲ្យលាលែងពីតំណែង​ជាអភិបាលក្រុង ដោយសារឈប់ញឹកពេក