ព័ត៌មានជាតិ

ក្រសួងមុខងារសាធារណៈ ប្រកាសជ្រើសរើសគ្រូបង្រៀនអនុវិទ្យាល័យ ជាង ៤ រយនាក់

បានផុស

១២ ខែ មុន

នៅ

ថ្ងៃព្រហស្បតិ៍ ១៥ កុម្ភៈ ២០២៤

ដោយ

នៅរសៀលថ្ងៃទី ១៥ ខែកុម្ភៈ ឆ្នាំ ២០២៤ នេះ ក្រសួងមុខងារសាធារណៈ បានចេញសេចក្ដីជូនដំណឹងស្ដីពី «ការប្រឡងប្រជែងជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យក្នុងក្របខណ្ឌក្រសួងអប់រំ យុវជន និងកីឡា» ដោយក្នុងនោះ ក្រសួង ប្រកាសជ្រើសរើសគ្រូបង្រៀនអនុវិទ្យាល័យ ចំនួន ៤៤១ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសេចក្ដីជូនដំណឹងស្ដីពី«ការប្រឡងប្រជែងជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យ ក្នុងក្របខណ្ឌក្រសួងអប់រំ យុវជន និងកីឡា» របស់ ក្រសួងមុខងារសាធារណៈ បានសរសេរឲ្យដឹងថា សម្រាប់ក្របខណ្ឌជ្រើសរើស ឆ្នាំ ២០២៣ គណៈកម្មការ នឹងរៀបចំការប្រឡងប្រជែងជ្រើសរើសគ្រូបង្រៀននៅអនុវិទ្យាល័យ ចំនួន ៤៤១ នាក់ ក្នុងនោះ៖

-តាមប្រព័ន្ធបណ្ដុះបណ្ដាល បរិញ្ញាបត្រ+១ ជំនាន់ទី ១ ចំនួន ១០៩ នាក់។

-តាមប្រព័ន្ធបណ្ដុះបណ្ដាល ១២+៤ ជំនាន់ទី ៤ ចំនួន ៨៩ នាក់។

-តាមប្រព័ន្ធបណ្ដុះបណ្ដាល ១២+២ ជំនាន់ទី ៣២ ចំនួន ២៤៣ នាក់។

សេចក្ដីជូនដំណឹងដដែល បញ្ជាក់ថា សម្រាប់ការបណ្ដុះបណ្ដាលមានរយៈពេល ១ ឆ្នាំ ៤ ឆ្នាំ និង ២ ឆ្នាំ ដោយចាប់ផ្ដើមនៅដើមឆ្នាំ ២០២៤ នៅតាមវិទ្យាស្ថាន គរុកោសល្យ និងមជ្ឈមណ្ឌលគរុកោសល្យភូមិភាគ ដូចមានភ្ជាប់ក្នុងសេចក្ដីជូនដំណឹងនេះ។

សម្រាប់លក្ខខណ្ឌ នៃការជ្រើសរើស ៖

១.បេក្ខជន ត្រូវមានសញ្ជាតិខ្មែរ

២.បេក្ខជន ត្រូវមានកម្រិតវប្បធម៌ចាប់ពីសញ្ញាបត្រមធ្យមសិក្សាទុតិយភូមិ ឬ សញ្ញាបត្រសមមូល ឬ សញ្ញាបត្រ បច្ចេកទេសវិជ្ជាជីវៈកម្រិត ៣ សម្រាប់ប្រព័ន្ធបណ្តុះបណ្តាល ១២+២ និង ១២+៤ និង សញ្ញាបត្រ បរិញ្ញាបត្រឡើងទៅសម្រាប់ប្រព័ន្ធបណ្ដុះបណ្ដាលបរិញ្ញាបត្រ+១។

៣.បេក្ខជន ត្រូវមានអាយុយ៉ាងតិច ១៦ ឆ្នាំ និងអាយុយ៉ាងច្រើនបំផុត គិតត្រឹមថ្ងៃទី ១៥ ខែមីនា ឆ្នាំ ២០២៤ តាមលក្ខខណ្ឌខាងក្រោម ៖

– បេក្ខជន មានសញ្ញាបត្របណ្ឌិត ត្រូវបានលើកលែងលក្ខខណ្ឌអាយុ

– បេក្ខជន មានសញ្ញាបត្របរិញ្ញាបត្រជាន់ខ្ពស់ ឬ សញ្ញាបត្រសមមូល ត្រូវមានអាយុច្រើនបំផុត ៤០ ឆ្នាំ

– បេក្ខជន មានសញ្ញាបត្របរិញ្ញាបត្រ ឬ សញ្ញាបត្រសមមូល ត្រូវមានអាយុច្រើនបំផុត ៣៥ ឆ្នាំ៕

សូមអានសេចក្ដីជូនដំណឹងលំអិតនៅខាងក្រោម ៖