អាមេរិក កំពុងភ័យរឿង រុស្ស៊ី ផលិតអាវុធ​នុយក្លេអ៊ែរ​ បាញ់កម្ទេចផ្កាយរណបរបស់ខ្លួន

តាមការបញ្ជាក់ពីមន្ត្រីអាមេរិក, ប្រទេសរុស្ស៊ី​ កំពុង​ផលិតអាវុធ​នុយក្លេអ៊ែរ​បាញ់ទៅ​លំហ​ ដើម្បី​ប្រឆាំងគោលដៅ​ផ្កាយរណប​របស់​ខ្លួន ដែលរឿងនេះពិតជា​បង្កឲ្យ​មានក្តីបារម្ភ​ផ្នែក​សន្តិសុខខ្លាំងមែនទែន នៅ​ក្នុងទី​ក្រុង​វ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា សារព័ត៌មាន NBC News អះអាងនៅថ្ងៃសុក្រទី១៦ខែកុម្ភៈថា អាវុធនេះមិនទាន់រួចរាល់ទេ ប៉ុន្តែវាអាចធ្វើឲ្យបណ្តាញផ្កាយរណបដ៏សំខាន់របស់សហរដ្ឋអាមេរិក ស្ថិតក្នុងគ្រោះថ្នាក់ ហើយជំរុញឲ្យប្រធានគណកម្មាធិការស៊ើបការណ៍សម្ងាត់សភាអាមេរិក អំពាវនាវដល់លោកប្រធានាធិបតី Joe Biden ឲ្យគិតគូរចំពោះព័ត៌មានដែលគំរាមកំហែងសន្តិសុខជាតិដ៏ធ្ងន់ធ្ងរនេះ។

ផ្កាយរណបរបស់អាមេរិក បានបញ្ជូនទិន្នន័យរាប់ពាន់លានបៃក្នុងមួយម៉ោង ហើយជាឆ្អឹងខ្នងដ៏សំខាន់សម្រាប់ទំនាក់ទំនងស៊ីវិលអាមេរិក ការរុករក ប្រតិបត្តិការយោធា និងចារកម្ម។

ជំនួយការម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះ ដោយសារតែនេះជាបញ្ហារសើបបានឲ្យដឹងថា យើងមិនទាន់ច្បាស់១០០%ទេថាតើអាវុធរុស្ស៊ីមានសមត្ថភាពនុយក្លេអ៊ែរឬក៏អត់ ប៉ុន្តែនេះគឺជារឿងគួរឲ្យភ័យខ្លាច។

ទោះបីជាយ៉ាងណាក៏ដោយ ទាក់ទិនបញ្ហាខាងលើ ភាគីខាងរុស្ស៊ីបានចេញមុខបដិសេធ ដោយអនុរដ្ឋមន្ត្រីការបរទេសនៃវិមានក្រឹមឡាំង លោក Sergei Ryabkov ប្រាប់ទៅសារព័ត៌មាន TASS ថា នេះគឺជាការប្រតិដ្ឋសុទ្ធសាធ និងគ្រាន់ជាល្បិចរបស់សេតវិមាន ក្នុងគោលបំណងបំភ័យឲ្យសមាជិកសភាអាមេរិក អនុម័តប្រាក់បន្ថែមដើម្បីប្រឆាំងទីក្រុងមូស្គូ ប៉ុណ្ណោះ។

ស្របពេលជាមួយគ្នានោះ អ្នកនាំពាក្យវិមានក្រឹមឡាំង លោក Dmitry Peskov ក៏បានប្រាប់ TASS ដែរថា “ច្បាស់ណាស់ សេតវិមានកំពុងលេងល្បិច បញ្ឆោតសភាឲ្យបោះឆ្នោតលើសេចក្តីព្រាងច្បាប់ បែងចែកប្រាក់”។

សូមបញ្ជាក់ថា អាមេរិក រុស្ស៊ី និងចិន សុទ្ធជាប្រទេសមានសមត្ថភាពវាយប្រហារផ្កាយរណបជុំវិញពិភពលោក ប៉ុន្តែតាមទ្រឹស្តី ពួកគេមិនអាចប្រើអាវុធនុយក្លេអ៊ែរនៅទីនោះបានឡើយ។ ប្រទេសទាំង៣ គឺហត្ថលេខីនៃសន្ធិសញ្ញាអវកាសខាងក្រៅឆ្នាំ១៩៦៧ ដែលហាមឃាត់ប្រទេសណាមួយពីការបញ្ជូនវត្ថុមានផ្ទុកអាវុធនុយក្លេអ៊ែរឬប្រភេទអាវុធប្រល័យលោក ចូលទៅក្នុងគន្លងអវកាស៕

អត្ថបទ៖ សុខ សុវណ្ណ

ចុចអាន៖ ផ្កាយរណបអឺរ៉ុបមួយគ្រឿង នឹងផ្ទុះធ្លាក់មកផែនដី នៅសប្តាហ៍ក្រោយ