រដ្ឋលេខាធិការម្នាក់ ត្រូវបានព្រះមហាក្សត្រចាត់ឱ្យធ្វើជាឯកអគ្គរដ្ឋទូតថ្មីរបស់កម្ពុជាប្រចាំចក្រភពអង់គ្លេស

រដ្ឋលេខាធិការក្រសួងការបរទេស លោកស្រី ទួត បញ្ញា ត្រូវ​បានព្រះបាទសម្ដេច​ ព្រះបរមនាថ នរោត្ដម សីហមុនី ព្រះមហាក្សត្រកម្ពុជា ចាត់តាំងឱ្យទៅធ្វើជាឯកអគ្គរាជទូតរបស់កម្ពុជាប្រចាំនៅចក្រភពអង់គ្លេស។ នេះបើតាមព្រះរាជក្រឹត្យចុះថ្ងៃទី១៤ ខែកុម្ភៈ។

តាមព្រះរាជក្រឹត្យ លោកស្រី ទួត បញ្ញា នឹងត្រូវធ្វើឯកអគ្គរាជទូតរបស់កម្ពុជាប្រចាំនៅប្រទេសអៀរឡង់ ដាណឺម៉ាក ស៊ុយអែត ន័រវែស និងហ្វាំងឡង់ ដែលមាននិវេសនដ្ឋាននៅទីក្រុងឡុងដ៍។

តាមរយៈការតែងតាំងលោកស្រី ទួត បញ្ញា នាពេលនេះ គឺមានន័យថាជាការជំនួសតំណែងលោក ឡាយ សំកុល  ដែលបានទៅកាន់ការងារជាឯកអគ្គរាជទូតរបស់កម្ពុជាប្រចាំចក្រភពអង់គ្លេស អៀរឡង់ ដាណឺម៉ាក ស៊ុយអែត ន័រវែស និងហ្វាំងឡង់ កាលពីឆ្នាំ២០២៣។

សម្រាប់ប្រវត្តិការងារ លោកស្រី ទួត បញ្ញា បានចាប់ផ្ដើមចូលបម្រើការងារនៅក្រសួងការបរទេស និងសហប្រតិបត្តការអន្តរជាតិ ក្នុងខែធ្នូ ឆ្នាំ១៩៨៣ ក្នុងតួនាទីជាមន្ត្រី នៃនាយកដ្ឋានព័ត៌មាន។ ក្រោយការបំពេញការងារជាង២៥ឆ្នាំ លោកស្រី ទួត បញ្ញា ចាប់ផ្ដើមទទួលតំណែងធំបំផុត គឺជាអនុរដ្ឋលេខាធិការក្រសួងការបរទេសនៅឆ្នាំ២០០៨។ រួចមកនៅខែធ្នូ ឆ្នាំ២០២០ លោកស្រីទទួលបានការតម្លើងតំណែងមួយកាំទៀត គឺជារដ្ឋលេខាធិការក្រសួងការបរទេស។

នេះជាលើកទី២ហើយ ដែលអ្នកការទូតស្ត្រីវ័យ៦៣ឆ្នាំ អាចនិយាយបានពីរភាសា ពោលគឺភាសាខ្មែរ និងភាសាអង់គ្លេសរូបនេះ ត្រូវទទួលបន្ទុកការងារជាឯកអគ្គរាជទូតរបស់កម្ពុជានៅលើដែនដីប្រទេសដទៃ។ លើកទីមួយដែលលោកស្រី ទួត បញ្ញា ត្រូវកាន់ការជាឯកអគ្គរដ្ឋទូតនៅក្រៅប្រទេសនោះគឺ ជាឯកអគ្គរាជទូតកម្ពុជាប្រចាំនៅប្រទេសហ្វីលីពីនចាប់ពីឆ្នាំ២០១៣ ដល់ឆ្នាំ២០១៨៕

ដោយ៖ ង៉ិល ណារ៉ាត់