​មន្ត្រីបន្តផ្ដល់សេវាអត្តសញ្ញាណកម្ម​ ជូនពលរដ្ឋ​ជាង ១ ម៉ឺននាក់ រយៈពេល៥ថ្ងៃ​

ឈរលើគោលការណ៍សេវាប្រកបដោយនិរន្តរភាពរយៈពេល៥ថ្ងៃ នៃម៉ោងការងាររដ្ឋបាលក្នុងសប្ដាហ៍នេះ មន្រ្តីរាជការស៊ីវិល និងមន្រ្តីនគរបាលជាតិ ដែលទទួលបន្ទុកលើការងារអត្តសញ្ញាណកម្ម បានបន្តផ្ដល់សេវាអត្តសញ្ញាណបណ្ណ លិខិតឆ្លងដែន លិខិតធ្វើដំណើរ សៀវភៅស្នាក់នៅ និងសៀវភៅគ្រួសារ ជូនប្រជាពលរដ្ឋ ទូទាំងប្រទេសបានចំនួន ១៣.៦៩៥ សេវា។ នេះបើតាមលោក ទូច សុខៈ អ្នកនាំពាក្យរងក្រសួងមហាផ្ទៃ។

បើតាមលោក ទូច សុខៈ ក្នុងចំណែកនៃសេវាអត្តសញ្ញាណកម្មនានា ដែលបានផ្ដល់ជូនសរុបនោះ សេវាអត្តសញ្ញាណបណ្ណមានចំនួន ៥.៣៦៩ សន្លឹក សេវាលិខិតឆ្លងដែនមានចំនួន ៣.៣៤៦លិខិត សេវាលិខិតធ្វើដំណើរមានចំនួន ១.៤៥៤​​លិខិត សេវាសៀវភៅស្នាក់នៅមានចំនួន ២.០៥៣ក្បាល និងសេវាសៀវភៅគ្រួសារមានចំនួន ១.៤៧៣ក្បាល។ តួលេខនេះ ប្រហាក់ប្រហែលគ្នានឹងសប្ដាហ៍មុនដែរ។

ក្នុងរយៈពេលពេញមួយខែមករា ឆ្នាំ២០២៤ មន្រ្តីអត្តសញ្ញាណកម្មទូទាំងប្រទេស នៃក្រសួងមហាផ្ទៃ បានផ្ដល់សេវាអត្តសញ្ញាណបណ្ណជូនពលរដ្ឋបានចំនួន ២៥.៤៨៨សន្លឹក លិខិតឆ្លងដែនចំនួន ២៤.៥៥០លិខិត លិខិតធ្វើដំណើរចំនួន ៦.០៥២លិខិត សៀវភៅស្នាក់នៅចំនួន ១១.០៧០ក្បាល និងសៀវភៅគ្រួសារចំនួន ៨.៦៨០ក្បាល៕