អេស្តូនី ផ្លែផ្កាទៅ រុស្ស៊ី វិញរឿងដីកាចាប់ខ្លួននាយករដ្ឋមន្ត្រីរបស់ខ្លួន

នាយករដ្ឋមន្ត្រីអេស្តូនីលោកស្រី Kaja Kallas កាលពីថ្ងៃអាទិត្យបានទាត់ចោលដីកាចាប់ខ្លួនលោកស្រីដែលដាក់ចេញដោយប្រទេសរុស្ស៊ី ហើយលោកស្រីថែមទាំងផ្លែផ្កាទៅវិញផងដែរថា នេះគ្រាន់តែជាការចិញ្ចឹមចិត្តដើម្បីបំភិតបំភ័យលោកស្រីតែប៉ុណ្ណោះ ហើយគ្មានអ្វីត្រូវខ្លាចញញើតនោះឡើយ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី១៨ ខែកុម្ភៈកន្លងទៅ ។

លោកស្រី Kallas បានប្រាប់ Reuters ក្នុងបទសម្ភាសន៍មួយនៅខាងក្រៅសន្និសីទសន្តិសុខទីក្រុង Munich ប្រទេសអាល្លឺម៉ង់ថា “រុស្ស៊ីមានបំណងសម្លុតគំរាម និងបំភិតបំភ័យខ្ញុំមិនឲ្យខ្ញុំធ្វើអ្វីបានតាមចិត្ត ប៉ុន្តែនេះគ្រាន់តែជាសៀវភៅរឿងល្ខោនរបស់រុស្ស៊ីប៉ុណ្ណោះ ។ វាមិនមានអ្វីគួរឲ្យភ្ញាក់ផ្អើលនោះទេ ហើយយើងក៏មិនខ្លាចញញើតនឹងបញ្ហានេះដែរ” ។

បច្ចុប្បន្នលោកស្រី Kallas កំពុងខ្នះខ្នែងជំរុញឲ្យសហភាពអឺរ៉ុប (EU) ធ្វើការងារបន្ថែមទៀតដើម្បីជួយជ្រោមជ្រែងដល់អ៊ុយក្រែន ហើយនេះក៏ជាសេណារីយ៉ូមួយដែលនាំឲ្យនាយករដ្ឋមន្ត្រីអេស្តូនីរូបនេះអាចទទួលបានតំណែងជាន់ខ្ពស់ណាមួយដូចជា ប្រធានគោលនយោបាយការបរទេស EU នៅក្រោយការបោះឆ្នោតសភា EU អាណត្តិថ្មីនាខែមិថុនាខាងមុខនេះ ។

ទន្ទឹមនោះ នៅពេលអ្នកសារព័ត៌មានចាក់សួរលោកស្រីទាក់ទិននឹងរឿងនេះ លោកស្រីនាយករដ្ឋមន្ត្រីថ្លែងទាំងហួសចិត្តថា “ខ្ញុំមិនទាន់ហ៊ានស្រមើស្រមៃឡើយ ព្រោះតែតំណែងទាំងនេះហើយទើបក្លាយជាឫសគល់ដែលរុស្ស៊ីចេញដីការចាប់ខ្លួនខ្ញុំ ហើយនេះជាអំណះអំណាងដ៏ធំបំផុតមួយប្រឆាំងមកលើរូបខ្ញុំ ក្រោមលេសថា ខ្ញុំជាអ្នកបង្ករឿងដល់រុស្ស៊ី” ។

គួរបញ្ជាក់ថា រុស្ស៊ីបានដាក់លោកស្រី Kallas និងអ្នកនយោបាយនៅមាត់សមុទ្របាល់ទិកជាច្រើនរូបទៀតចូលក្នុងបញ្ជីខ្មៅតាមចាប់ខ្លួនកាលពីថ្ងៃទី១៣ ខែកុម្ភៈក្រោមបទចោទប្រកាន់ ប្រមាថ និងវាយកម្ទេចស្តូបអនុស្សាវរីយ៍សង្គ្រាមលោកលើកទី ២ ជាពិសេសនាយករដ្ឋមន្ត្រីអេស្តូនីរូបនេះគឺជាអ្នកគាំទ្រផ្កាប់មុខដល់រដ្ឋាភិបាលទីក្រុងកៀវ និងជាអ្នករិះគន់យ៉ាងចាស់ដៃទៅលើទីក្រុងមូស្កូ ចាប់តាំងផ្ទុះភ្លើងសង្គ្រាមរុស្ស៊ីទៅលើអ៊ុយក្រែនកាលពីជិត ២ ឆ្នាំមុន ៕

ដោយ ៖ សុខ ជីវ័ន្ត

ចុចអាន ៖ អាមេរិក ព្រមានលោក ពូទីន កុំមកចេះជ្រៀតជ្រែកការបោះឆ្នោតរបស់ខ្លួន