រដ្ឋមន្ត្រីសុខាភិបាលជំរុញឱ្យបង្កើនការផ្សាយសារអប់រំសុខភាពតាមរយៈផ្ទាំងរូបភាព និងវីដេអូខ្លីៗដល់ពលរដ្ឋ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានជំរុញដល់មន្ទីរពេទ្យ និងមណ្ឌលសុខភាពធ្វើការផ្សព្វផ្សាយសារអប់រំសុខភាពតាមរយៈផ្ទាំងរូបភាព និងវីដេអូខ្លីៗជូនដល់ប្រជាពលរដ្ឋដើម្បីឱ្យពួកគាត់ទទួលបានចំណេះដឹង និងចេះការពារខ្លួនពីជំងឺដង្កាត់ផ្សេងៗ។

នៅក្នុងកិច្ចប្រជុំកម្រិតថ្នាក់ដឹកនាំ លើកទី២ខែកុម្ភៈ ដើម្បីពិនិត្យវឌ្ឍនភាពការងារ និងលើកទិសដៅការងារបន្តកាលពីរសៀលថ្ងៃទី១៩​កុម្ភៈ លោករដ្ឋមន្ត្រីបានមានប្រសាសន៍ថា «ការខិតខំលើការអប់រំលើកកម្ពស់សុខភាពតាមរយៈការធ្វើការផ្សព្វផ្សាយសារអប់រំ គឺជាឱកាសមួយបន្ថែមទៀតដែលពិតជាចូលរួមផ្តល់ចំណេះដឹងផ្នែកសុខភាពជូនដល់បងប្អូនសាធារណជនដើម្បីលោកកាន់តែងាយស្រួលក្នុងការមើលថែខ្លួនដោយខ្លួនឯងក៏ដូចជាការចូលរួមសម្រេចចិត្តជាមួយក្រុមគ្រូពេទ្យលើវិធីសាស្ត្រនានាការពារសុខភាព និងក្រុមគ្រួសារ។ ឧទារហណ៍ ការបង្ការរោគ ការបង្ការជំងឺឆ្លងផ្សេងៗ និងជំងឺរ៉ាំរ៉ៃមួយចំនួនដូចជា ជំងឺទឹកនោមផ្អែម លើសឈាម ជំងឺមហារីកជាដើម»។

លោករដ្ឋមន្រ្តី បានស្នើពិនិត្យ និងរៀបចំផែនការឱ្យបានកាន់តែច្បាស់លាស់ និងសុក្រឹតបន្ថែមទៀត សម្រាប់ការអនុវត្តការងារប្រកបដោយប្រសិទ្ធិភាពដោយឈរលើគោលការណ៍ធានាឱ្យបានធនធានសម្ភារៈធនធានមនុស្សសមស្របទៅតាមតម្រូវការ និងកម្រិតសកម្មភាពនៃមន្ទីរពេទ្យឬមណ្ឌលសុខភាព។ បន្ថែមពីនោះគឺត្រូវពង្រឹងនូវបញ្ញត្តិនៃទម្រង់ការងារទាំងវិស័យសាធារណៈ និងវិស័យឯកជនព្រមទាំងបន្តង្រីកវិសាលភាពនៃវិស័យបណ្តុះបណ្តាលផ្នែកសុខាភិបាលតាមគ្រប់រូបភាព ពិសេសការផ្លាស់ប្តូរបទពិសោធន៍របស់យើងជាមួយប្រទេសជិតខាង ក្នុងតំបន់ និងអន្តរជាតិ៕

អត្ថបទ៖ សំអឿន