ព័ត៌មានអន្ដរជាតិ

តំបន់ទេសចរណ៍ចំនួន ៣ នៅ ឡាវ ជួបបញ្ហាខ្យល់ពុលក្នុងកម្រិតប៉ះពាល់សុខភាព

បានផុស

១១ ខែ មុន

នៅ

ថ្ងៃព្រហស្បតិ៍ ២២ កុម្ភៈ ២០២៤

ដោយ

ប្រទេសឡាវកំពុងជួបប្រទះនូវការកើនឡើងនៃកម្រិតខ្យល់ពុលដែលប៉ះពាល់ដល់សុខភាព ពិសេសនៅតំបន់ទេសចរណ៍សំខាន់ៗចំនួន ៣ រួមមានរដ្ឋធានីវៀងចន្ទន៍ ខេត្តហ្លួងព្រះបាង និងខេត្តចំប៉ាស័ក្តិ ។ នេះបើតាមការចេញផ្សាយដោយសារព័ត៌មានឡាវ Laotian Times ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានដដែលបានឲ្យដឹងថា យោងតាមកម្រិតរង្វាស់គុណភាពខ្យល់ (AQI) នៅរដ្ឋធានីវៀងចន្ទន៍កាលពីថ្ងៃ១៩ កុម្ភៈ គឺមានកម្រិតពី ១៥៥ ដល់ ១៦០ ដែលជាសញ្ញាបង្ហាញថា គុណភាពខ្យល់ឈានដល់ការប៉ះពាល់ទៅដល់សុខភាព ខណៈកម្រិតខ្យល់ដែលមានគុណភាពធម្មតាមិនប៉ះពាល់សុខភាពគឺក្រោម ឬស្មើ ១០០ ។ ដោយឡែក ខេត្តហ្លួងព្រះបាង និងសង្កាត់ប៉ាកសេ ក្នុងខេត្តចំប៉ាស័ក្តិ មានកម្រិតដល់ ១៥៨ ដល់ ១៦០ ផងដែរ ។

អត្រាកម្រិតខ្យល់ពុលនៅក្នុងបណ្ដាខេត្តខាងលើបានកើនឡើង និងធ្ងន់ធ្ងរ ចាប់តាំងពីចុងសបា្តហ៍កន្លងទៅ ពោលចាប់ពីថ្ងៃទី១៧ ខែកុម្ភៈមកម្ល៉េះ ហើយកត្តាសំខាន់ដែលរួមផ្សំក្នុងកំណើនខ្យល់ពុលនេះ គឺមាន ទម្លាប់ដុតសំរាមរបស់ប្រជាជន ការកាប់ព្រៃឈើ និងដុតទន្ទ្រានយកដីសម្រាប់កសិកម្ម ។ នេះបើតាមការបើកបង្ហាញពីក្រសួងធនធានធម្មជាតិ និងបរិស្ថាននៃប្រទេសឡាវ ។

យ៉ាងណាក្តី នៅក្នុងទិសដៅដើម្បីបន្ថយកម្រិតខ្យល់បំពុលដើម្បីសុខភាពនេះ ក្រសួង និងអជ្ញាធរពាក់ព័ន្ធនៃប្រទេសឡាវបានសហការជាមួយភ្នាក់ងារអង្គការសុខភាពពិភពលោក (WHO) បន្តអនុវត្តយុទ្ធនាការបញ្ជ្រាបការយល់ដឹងទៅដល់ប្រជាពលរដ្ឋឡាវ អំពីបញ្ហាដើមហេតុទាំងនោះ ដើម្បីស្របនឹងទិសដៅរដ្ឋាភិបាលឡាវដែលសង្ឃឹមថា នឹងសម្រេចបានការបន្ថយទម្លាប់ដុតព្រៃឲ្យបានប្រមាណ ៣៥ ភាគរយនៅត្រឹមឆ្នាំ ២០២៥ ។

គួររំឭកថា មិនត្រឹមតែប្រទេសឡាវនោះទេដែលជួបបញ្ហានេះ ប្រទេសថៃក្បែរខាងឡាវ ក៏កំពុងប្រឈមនឹងបញ្ហាខ្យល់ពុលដូចគ្នា និងបានចាត់វិធានការផ្សេងៗជាបន្តបន្ទាប់ដើម្បីឆ្លើយតបបណ្តោះអាសន្នទៅលើករណីខ្យល់ពុល ដែលកើតមានឡើងជាពិសេសនៅតំបន់ប្រជុំជនក្នុងទីក្រុង ៕