ចិន ប្រាប់ឲ្យអាមេរិក ឈប់យកកោះតៃវ៉ាន់ ធ្វើឧបករណ៍ដើម្បីទប់ទល់ជាមួយខ្លួន

អ្នកនាំពាក្យក្រសួងការពារជាតិចិន លោក Zhang Xiaogang បាននិយាយកាលពីថ្ងៃសុក្រទី២៣ខែកុម្ភៈថា រដ្ឋាភិបាលទីក្រុងប៉េកាំង សូមអំពាវនាវឲ្យទីក្រុងវ៉ាស៊ីនតោន លែងបំពាក់អាវុធដល់តៃវ៉ាន់ ហើយបញ្ឈប់ការបង្ករឿងដោយប្រើកោះនេះ ធ្វើជាឧបករណ៍ដើម្បីទប់ទល់ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវនេះកើតឡើង បន្ទាប់ពីទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណ (DSCA) ប្រកាសថា ក្រសួងការបរទេសអាមេរិក បានអនុម័តការលក់អាវុធតម្លៃ ៧៥លានដុល្លារ ទៅឲ្យកោះតៃវ៉ាន់។

ពាក់ព័ន្ធបញ្ហានេះ លោក Zhang បាននិយាយក្នុងសេចក្តីថ្លែងការណ៍មួយ ដែលចេញផ្សាយដោយសារព័ត៌មាន Xinhua ថា “យើងជំរុញឲ្យសហរដ្ឋអាមេរិក គោរពម៉ឺងម៉ាត់នូវគោលការណ៍ចិនតែមួយ និងបទប្បញ្ញត្តិនៃសេចក្តីថ្លែងការណ៍រួមចិន-អាមេរិកទាំងបី ដោយបញ្ឈប់ការលក់អាវុធដល់តៃវ៉ាន់ និងទំនាក់ទំនងយោធាវ៉ាស៊ីនតោន-តៃប៉ិ, ការបំពាក់អាវុធដល់តៃវ៉ាន់តាមគ្រប់មធ្យោបាយ និងសកម្មភាពបង្កហេតុនានា។ បញ្ហាតៃវ៉ាន់គឺជាបន្ទាត់ក្រហមទីមួយ ក្នុងទំនាក់ទំនងចិន-អាមេរិក ដែលមិនត្រូវឆ្លងកាត់ឡើយ ហើយការបំពាក់អាវុធដល់កោះនេះគឺជាល្បែងដ៏គ្រោះថ្នាក់”។

លើសពីនេះ លោកអះអាងថា ចិននឹងចាត់វិធានការម៉ឺងម៉ាត់ និងមានប្រសិទ្ធភាព ដើម្បីការពារអធិបតេយ្យជាតិ និងបូរណភាពទឹកដី។

ភាពតានតឹងរវាងសហរដ្ឋអាមេរិកនិងចិន បានឈានដល់ចំណុចខ្ពស់ក្នុងខែសីហាឆ្នាំ២០២២ បន្ទាប់ពីប្រធានរដ្ឋសភាអាមេរិកគឺលោកស្រី Nancy Pelosi ធ្វើដំណើរទៅកាន់កោះតៃវ៉ាន់ ថ្វីបើមានការព្រមានមិនដាច់ពីមាត់ពីទីក្រុងប៉េកាំង ប្រឆាំងនឹងដំណើរទស្សនកិច្ចនេះក៏ដោយ។

ពេលនោះ ទីក្រុងប៉េកាំងបានថ្កោលទោសដំណើររបស់លោកស្រី Pelosi ដោយចាត់ទុកថាជាកាយវិការគាំទ្រចំពោះការបំបែកខ្លួន ហើយក៏ចាប់ផ្តើមសមយុទ្ធយោធាទ្រង់ទ្រាយធំនៅតំបន់ជុំវិញកោះនេះតែម្តង៕

អត្ថបទ៖ សុខ សុវណ្ណ

ចុចអាន៖ អាមេរិក ផលិតមីស៊ីល ៥០ គ្រាប់ក្នុងតម្លៃ ៦៨.៤ លានដុល្លារឲ្យ តៃវ៉ាន់ ដើម្បីផ្គាប់ចិត្តមេដឹកនាំថ្មី