ព័ត៌មានជាតិ

ដំណើរការបោះឆ្នោតជ្រើសតាំងសមាជិកព្រឹទ្ធសភា នៅខេត្តកោះកុង បញ្ចប់ដោយរលូន

បានផុស

៧ ខែ មុន

នៅ

ថ្ងៃអាទិត្យ ២៥ កុម្ភៈ ២០២៤

ដោយ

ដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ នៅខេត្តកោះកុង បានបញ្ចប់ដោយរលូនល្អប្រសើរដូចតាមការគ្រោងទុក ហើយជាលទ្ធផលបឋមគណបក្សប្រជាជនកម្ពុជាទទួលបាន ១៤៨ សំឡេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បរិយាកាសអង្គបោះឆ្នោតជ្រើសតាំងសមាជិកព្រឹទ្ធសភា នៅការិយាល័យបោះឆ្នោតលេខ ៧០០៤ ស្ថិតក្នុងបរិវេណសាលមហោស្រពខេត្តកោះកុង ចាប់ពីម៉ោង ៧ ដល់ម៉ោង ១១ និង ៥៧ នាទី ថ្ងៃទី ២៥ ខែកុម្ភៈ ឆ្នាំ ២០២៤ បានប្រព្រឹត្តដោយរលូន ក្រោមការថែរក្សាការពារសន្តិសុខសណ្ដាប់ធ្នាប់ ពុំមានបាតុភាពមិនល្អអ្វីកើតគួរឱ្យកត់សម្គាល់នោះទេ។

លោក សេង ណេង ប្រធានលេខាធិការដ្ឋានរៀបចំការបោះឆ្នោតខេត្តកោះកុង បានឱ្យដឹងថា ក្រោយការរាប់សន្លឹកឆ្នោតដោយប្រុងប្រយ័ត្ន គឺលទ្ធផលបឋម នៃដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ នៅក្នុងខេត្តកោះកុង គណបក្សប្រជាជនកម្ពុជា ទទួលបាន ១៤៨ សំឡេង គណបក្សឆន្ទៈខ្មែរទទួល ២០ សំឡេង គណបក្សហ្វ៊ុនស៊ិនប៉ិច ទទួលបាន ០ សំឡេង និង គណបក្សកម្លាំងជាតិ ទទួលបាន ០ សំឡេង។

លោក សេង ណេង បន្ថែមថា សម្រាប់អង្គបោះឆ្នោតជាអ្នកតំណាងរាស្ត្រ និងសមាជិកក្រុមប្រឹក្សាឃុំ-សង្កាត់ ទាំង ១៦៨ រូប បានអញ្ជើញចូលរួមបោះឆ្នោតយ៉ាងផុលផុសប្រកបដោយស្នាមញញឹមរបស់ខ្លួន។ ក្រោយបង្ហាញលទ្ធផលឆ្នោតជាបឋមនេះហើយ ក្រុមការងារ ក៏បានដឹកជញ្ជូនហិបឆ្នោតទៅកាន់លេខាធិការដ្ឋានរៀបចំការបោះឆ្នោតខេត្តផងដែរ៕

អត្ថបទ ៖ សិរីវឌ្ឍនៈ