ព័ត៌មានជាតិ

ឯកឧត្ដម ហ៊ុន ម៉ានី ៖ អង្គបោះឆ្នោត បានអញ្ជើញទៅអនុវត្តសិទ្ធិខ្លួន ដោយគ្មានការគំរាមកំហែង ឬ បង្ខិតបង្ខំ

បានផុស

១២ ខែ មុន

នៅ

ថ្ងៃចន្ទ ២៦ កុម្ភៈ ២០២៤

ដោយ

ឯកឧត្ដម ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា លើកឡើងថា អង្គបោះឆ្នោត មានសិទ្ធិបោះឆ្នោត បានអញ្ជើញចេញទៅអនុវត្តសិទ្ធិរបស់ខ្លួន ឈរលើមូលដ្ឋាន នៃការសម្រេចចិត្ត ដោយគ្មានការគំរាមកំហែង ឬ បង្ខិតបង្ខំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្ដម ហ៊ុន ម៉ានី លើកឡើងបែបនេះ បន្ទាប់ពី ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ បានដំណើរការ និងបញ្ចប់ដោយរលូន កាលពីថ្ងៃទី ២៥ ខែកុម្ភៈ ឆ្នាំ ២០២៤ ម្សិលមិញ។

ឯកឧត្ដម ហ៊ុន ម៉ានី លើកឡើងថា «ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ត្រូវបានរៀបចំឡើងតាមការគ្រោងទុក និងបានបញ្ចប់ទៅវិញប្រកបដោយភាពស្ងប់ស្ងាត់ សណ្ដាប់ធ្នាប់ និងរបៀបរៀបរយ។ អង្គបោះឆ្នោត ដែលមានសិទ្ធិបោះឆ្នោត បានអញ្ជើញចេញទៅអនុវត្តសិទ្ធិរបស់ខ្លួន ដោយឈរលើមូលដ្ឋាន នៃការសម្រេចចិត្ត ដោយគ្មានការគំរាមកំហែង ឬ បង្ខិតបង្ខំ»។

ឯកឧត្ដម លើកឡើងបន្តថា សន្តិភាព និងស្ថិរភាពនយោបាយ ដែលចាក់ឫសយ៉ាងរឹងមាំ បានរួមចំណែកធ្វើឲ្យដំណើរការប្រជាធិបតេយ្យនៅព្រះរាជាណាចក្រកម្ពុជាមានភាពស្វាហាប់ និងម្ចាស់ការ អាចរៀបចំការបោះឆ្នោតប្រកបដោយជោគជ័យ ស្របតាមនិយាមជាតិ និងអន្តរជាតិ។

ជាមួយនោះ ឯកឧត្ដម ក៏បានអំណរគុណដល់ស្ថាប័ន និងភាគីពាក់ព័ន្ធ រួមមាន គណៈកម្មាធិការជាតិរៀបចំការបោះឆ្នោត អាជ្ញាធរមូលដ្ឋាន កងកម្លាំងមានសមត្ថកិច្ច មន្ត្រីការិយាល័យបោះឆ្នោត ភ្នាក់ងារគណបក្ស និងអ្នកសង្កេតការណ៍ដែលបានចូលរួមធានាប្រក្រតីភាព នៃដំណើរការបោះឆ្នោត ទទួលបាននូវភាពត្រឹមត្រូវ និងយុត្តិធម៌ សម្រាប់គ្រប់គណបក្សនយោបាយ។

គួរជម្រាបថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ឆ្នាំ ២០២៤ ម្សិលមិញ បានដំណើរការ និងបញ្ចប់ដោយរលូន។ ក្នុងនោះ គណបក្សនយោបាយដែលបានឈរឈ្មោះបោះឆ្នោតជ្រើសតាំងសមាជិកព្រឹទ្ធសភានីតិកាលទី ៥ ឆ្នាំ ២០២៤ នេះ មានចំនួន ៤ គណបក្ស គឺ ៖ ១.គណបក្សប្រជាជនកម្ពុជា។ ២.គណបក្ស ឆន្ទៈខ្មែរ។ ៣.គណបក្សហ្វ៊ុនស៊ិនប៉ិច។ ៤.គណបក្ស កម្លាំងជាតិ ៕

អត្ថបទ ៖ ពិសី