កម្ពុជា គ្រងលេខ ១០ ជាប្រទេសផលិតស្រូវអង្ករច្រើនជាងគេលើលោក

ជារឿងដ៏អស្ចារ្យមួយដែលព្រះរាជាណាចក្រកម្ពុជាជាប់ឈ្មោះក្នុងបញ្ចីកំពូលទាំង ១០ ជាប្រទេសផលិតស្រូវអង្ករបានច្រើនជាងគេនៅលើពិភពលោកកាលពីឆ្នាំ ២០២៣ កន្លងទៅ ពោលកម្ពុជាផលិតស្រូវអង្ករបានចំនួន ៥.៩៣ លានតោន និងគ្រងលំដាប់ទី ១០ នេះតែម្ដង ។ នេះបើយោងតាមទិន្នន័យរបស់គេហទំព័រអាល្លឺម៉ង់ Statista ។

ចំណែកប្រទេសដែលជាអធិរាជផលិតស្រូវអង្ករច្រើនបំផុតលំដាប់ទី ១ លើពិភពលោកនោះគឺបានទៅលើមហាយក្ស ចិន ។ ពេញមួយឆ្នាំ ២០២៣ ចិនផលិតស្រូវអង្ករបានជាង ១៥៦ លានតោន ខណៈតោងពីក្រោយ ពោលលំដាប់ទី ២ គឺឥណ្ឌាជាអ្នកឱបក្រសោប ដោយប្រទេសនេះផលិតស្រូវអង្ករបានប្រមាណ ១៣៥.៧៦ លានតោនកាលពីឆ្នាំមុន ។

ដោយឡែកលេខ ៣ គឺប្រទេសបង់ក្លេដេសផលិតស្រូវអង្ករបាន ៣៦.៣៥ លានតោន ខណៈឥណ្ឌូណេស៊ីឈរនៅលំដាប់ទី ៤ ឲ្យផលស្រូវអង្ករបាន ៣៤ លានតោន ឯប្រទេសភូមិផងរបងជាមួយកម្ពុជា ដូចជា វៀតណាមផលិតបាន ២៦.៩៤ លានតោន និងថៃបាន ២០.៩១ លានតោនស្ថិតនៅលេខរៀងទី ៦ ។

ទន្ទឹមនោះ ប្រទេសអាស៊ាន ២ ទៀតដូចជា ហ្វីលីពីនឈរនៅលំដាប់ទី ៧ ។ កាលពីឆ្នាំ ២០២៣ ហ្វីលីពីនផលិតស្រូវអង្ករបាន ១២.៦៣ លានតោន ខណៈដែលប្រទេសកំពុងជួបស្ថានភាពវឹកវរ មីយ៉ាន់ម៉ា គ្រងលេខ ៨ ទទួលផលបាន ១១.៨០ លានតោន និងលេខ ៩ ធ្លាក់ទៅលើប្រទេសមហាអំណាចសេដ្ឋកិច្ចលំដាប់ទី ៤ លើពិភពលោក ជប៉ុន ពោលប្រទេសនេះផលិតស្រូវអង្ករបាន ៧.៤៨ លានតោន ។

គួរបញ្ជាក់ថា បើគិតក្នុងតំបន់អាស៊ានវិញ កម្ពុជាគ្រងលំដាប់ទី ៦ ហើយឥណ្ឌូណេស៊ីជាប្រទេសកាន់កាប់កំពូលតារាង ខណៈជាបន្តបន្ទាប់មកទៀតគឺ វៀតណាមជាប់លេខ ២ តោងពីក្រោយឥណ្ឌូណេស៊ី ចំណែកថៃលេខ ៣, ហ្វីលីពីនលេខ ៤ និងមីយ៉ាន់ម៉ាលេខ ៥ ឈរនៅលើកម្ពុជា ៕

ដោយ ៖ សុខ ជីវ័ន្ត

ចុចអាន ៖ លោក សេដ្ឋា ជិះរថយន្ត Lexus តម្លៃជាង ២១ ម៉ឺនដុល្លារទៅសួរសុខទុក្ខ លោក ថាក់ស៊ីន ដល់ភូមិគ្រឹះ