អាមេរិក ប្រកាសទម្លាក់ជំនួយនៅហ្គាហ្សា ប៉ុន្មានថ្ងៃទៀត

លោកប្រធានាធិបតី ចូ បៃដិន កាលពីថ្ងៃសុក្រទី១ខែមីនាបានប្រកាសថា សហរដ្ឋអាមេរិកនឹងទម្លាក់ជំនួយមនុស្សធម៌ក្នុងតំបន់ហ្គាហ្សា ចំពេលអង្គការសហប្រជាជាតិព្រមានខ្លាំងៗអំពីគ្រោះទុរ្ភិក្សនៅទីនោះ ដោយសារសង្គ្រាមអ៊ីស្រាអែល-ហាម៉ាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនកិច្ចប្រជុំជាមួយនាយករដ្ឋមន្រ្តីអ៊ីតាលីនៅការិយាល័យ អូវ៉ាល់, លោក បៃដិន ប្រាប់អ្នកសារព័ត៌មានថា “ប៉ុន្មានថ្ងៃខាងមុខ យើងនឹងចូលរួមជាមួយមិត្តរបស់យើងនៅក្នុងប្រទេសហ្ស៊កដានី និងអ្នកផ្សេងៗ ដើម្បីផ្តល់ជំនួយជាស្បៀងអាហារ និងគ្រឿងផ្គត់ផ្គង់បន្ថែមទៀត”។

លោកបន្តថា សហរដ្ឋអាមេរិកនឹងដាក់សម្ពាធលើអ៊ីស្រាអែល ឲ្យជួយសម្រួលដល់ការដឹកជញ្ជូនជំនួយមនុស្សធម៌នេះ បន្ទាប់ពីជនជាតិប៉ាឡេស្ទីនរាប់សិបនាក់ ត្រូវបានសម្លាប់ខណៈពេលពួកគេដណ្តើមគ្នាយកជំនួយពីក្បួនរថយន្តកាលពីដើមសប្តាហ៍នេះ។

ទន្ទឹមនោះ មន្ត្រីសេតវិមានក៏បានសង្កត់ធ្ងន់លើស្ថានភាពដ៏ស្មុគស្មាញ និងគ្រោះថ្នាក់នៃការទម្លាក់ជំនួយតាមយន្តហោះផងដែរ ដោយនិយាយថា “វាពិតជាលំបាកខ្លាំងណាស់ដែលត្រូវទម្លាក់ជំនួយពីយន្តហោះ នៅក្នុងបរិយាកាសដែលមានមនុស្សច្រើនកកកុញបែបនេះ។ វាអាចបង្កហានិភ័យ បង្កើតបានជាគ្រោះថ្នាក់ក្នុងចំណោមជនស៊ីវិល”។

ប្រទេសមួយចំនួន បានថ្កោលទោសកងកម្លាំងអ៊ីស្រាអែលរួចទៅហើយ ចំពោះការបាញ់ប្រហារទៅលើជនស៊ីវិលប៉ាឡេស្ទីនដែលកំពុងរង់ចាំបើកស្បៀងនិងជំនួយដ៏ទៃទៀតនៅហ្គាហ្សា។

ក្រសួងសុខាភិបាលហ្គាហ្សា ដែលគ្រប់គ្រងដោយក្រុមហាម៉ាស បានបង្ហាញតួលេខថា មនុស្សជាង១០០នាក់ត្រូវបាត់បង់ជីវិត និងជាង៧៥០នាក់រងរបួសក្នុងហេតុការណ៍នោះ។

ទោះបីជាយ៉ាងណាក៏ដោយ អ៊ីស្រាអែលចេញមុខការពារខ្លួនដោយនិយាយថា តាមពិតទៅ ម​នុស្សជាច្រើនត្រូវស្លាប់ដោយសាររត់ជាន់គ្នាទេពេលដែលពួកគេសម្រុកចូលយកជំនួយ ហើយថា ទាហានរបស់ខ្លួន បាញ់កាំភ្លើង ពេលដែលពួកគេស្ថិតក្នុងស្ថានភាពគ្រោះថ្នាក់ប៉ុណ្ណោះ។

សូមជម្រាបជាថ្មី ជាការសងសឹក​បន្ទាប់​ពីក្រុមហាម៉ាស វាយឆ្មក់​កាល​ពី​ថ្ងៃ​ទី៧ខែ​តុលា, ភាគីអ៊ីស្រាអែល​ ក៏បាន​បើក​ការ​វាយលុកនៅ​តំបន់​ហ្គាហ្សា​ សម្លាប់មនុស្ស​ប្រមាណ៣០០០០នាក់។

ស្របពេលជាមួយគ្នានោះ យោងតាម UN, ប្រហែល៦០% នៃហេដ្ឋារចនាសម្ព័ន្ធទីនោះ ត្រូវបានបំផ្លាញឬកម្ទេចទាំងស្រុង៕

អត្ថបទ៖ សុខ សុវណ្ណ

ចុចអាន៖ ពលរដ្ឋហ្គាហ្សា ខ្លះជិះទូក ខ្លះហែលទឹក ចូលសមុទ្រ ប្រថុយជីវិតទៅយកជំនួយ