កីឡា

ធ្វើការសំណង់ច្រើនឆ្នាំ ពេជ្រ ប៊ុនសិទ្ធ មកចាប់អាជីពប្រដាល់ដ៏ជោគជ័យ

បានផុស

១០ ខែ មុន

នៅ

ថ្ងៃព្រហស្បតិ៍ ៧ មីនា ២០២៤

ដោយ

ដំរីយោលដៃ ព្រេជ ប៊ុនសិទ្ធ កំពុងទទួលបានការគាំទ្រខ្លាំងតាមរយៈសមត្ថភាពដើរចូលវ៉ៃបុក និងទើបតែឈ្នះខ្សែក្រវាត់ទី៣ក្នុងអាជីព ប៉ុន្តែកាលពីក្មេងរូបគេបានដើរធ្វើការងាររកលុយពីកន្លែងមួយទៅកន្លែងមួយមុនពេលចាប់អាជីពប្រដាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កើតក្នុងគ្រួសារមានជីវភាពខ្វះខាត ពេជ្រ ប៊ុនសិទ្ធ ស្ទើរតែមិនជឿថា ជីវិតរបស់ខ្លួនមានភាពល្អប្រសើរដូចបច្ចុប្បន្ន។ កីឡាករបានរៀបរាប់ថា រូបគេធ្លាប់ដើរធ្វើការឲ្យគេពីកន្លែងមួយទៅកន្លែងមួយទាំងនៅក្នុងខេត្តបាត់ដំបង និងខេត្តផ្សេងៗដូចជាធ្វើសំណង់ជាដើមដើម្បីបានប្រាក់ផ្គត់ផ្គង់ក្នុងគ្រួសារ។ ដោយមានចិត្តស្រឡាញ់កីឡាប្រដាល់គុនខ្មែរ រូបគេបានចាប់ហ្វឹកហាត់ជាមួយកីឡាករ កែវ រំចង់ កាលពីឆ្នាំ២០១៦ជាពេលរូបគេធំពេញវ័យ។

ពេជ្រ ប៊ុនសិទ្ធ បានប្រាប់«កម្ពុជាថ្មី»ថា ៖«ពីមុនខ្ញុំដើរធ្វើការឲ្យគេ ធ្វើការសំណង់ ធ្វើជាងពិដាន ព្រោះឪពុកម្ដាយក្រ សូម្បីដីធ្វើស្រែក៏អត់មាន។ ពេលធ្វើសំណង់ ខ្ញុំស្រឡាញ់ប្រដាល់ ប៉ុន្តែអត់ស្គាល់គេទេ។ ថ្ងៃមួយបានទៅសុំបង កែវ រំចង់។ ពេលនោះសុំឲ្យគេជូនទៅហាត់នៅផ្ទះគាត់ ហើយក៏ចាប់ផ្តើមហាត់ពីពេលនោះមក»។

ការចូលហ្វឹកហាត់របស់កីឡាករ ពេជ្រ ប៊ុនសិទ្ធ មិនទទួលបានការគាំទ្រពេញលេញពីក្រុមគ្រួសារទេ។ បន្ទាប់ពីបានហ្វឹកហាត់មួយរយៈពេលមក រូបគេបានចេញប្រកួតដំបូង និងទទួលបានប្រាក់ប្រមាណ១៥ម៉ឺនរៀល ហើយមានរបួសបែកថែមទៀត ជាហេតុធ្វើឲ្យអ្នកមានគុណស្ដីបន្ទោស។ ពួកគាត់តែងតែប្រាប់ខ្លួនឲ្យឈប់ពីប្រដាល់ ប៉ុន្តែរូបគេនៅតែតស៊ូនឹងអាជីពឈឺខ្លួន។

ពេជ្រ ប៊ុនសិទ្ធ បានប្រាប់ថា ៖«ការប្រកួតលើកដំបូង ខ្ញុំប្រកួតចាញ់ហើយបែកទៀត។ ពេលនោះបានលុយ១៥ម៉ឺនរៀលគ្រាន់តែចាយវាយហូបចុកហើយជិះឡានទៅស្រុកវិញអស់លុយបាត់។ បើម្ដាយខ្ញុំវិញ គាត់ស្ដីបន្ទោសរហូត ព្រោះវ៉ៃបានលុយតិច ពេលនោះគាត់អត់គាំទ្រខ្ញុំទេ»។

សព្វថ្ងៃ ពេជ្រ ប៊ុនសិទ្ធ មានជីវភាពសមរម្យ ក្រោយពីការតស៊ូក្នុងវិស័យប្រដាល់ជាច្រើនឆ្នាំ។ បច្ចុប្បន្នរូបគេកំពុងគ្រងខ្សែក្រវាត់៣គ្រឿងគឺខ្សែក្រវាត់ខារ៉ាបាវកាលពីឆ្នាំ២០២៣មានប្រាក់រង្វាន់៦ពាន់ដុល្លារ, ខ្សែក្រវាត់គុនខ្មែរអលស្ដារកាលពីឆ្នាំ២០២៣ និងខ្សែក្រវាត់សហព័ន្ធកីឡាប្រដាល់គុនខ្មែរនៅឆ្នាំ២០២៤មានប្រាក់រង្វាន់៥ពាន់ដុល្លារ។ រូបគេបានឡើងប្រកួតញឹកញាប់ស្ទើរគ្មានខែណាមួយដែលមិនប្រកួតទេ។

ពេជ្រ ប៊ុនសិទ្ធ បានបន្ថែមថា អាជីពប្រដាល់ជួយបានច្រើន បូករួមទាំងការចេះសន្សំសំចៃផងនោះបានផ្តល់ឲ្យគ្រួសារមានជីវភាពល្អប្រសើរជាងមុន។ អនាគតរូបគេមានគម្រោងបើកអាជីវកម្មផ្ទាល់ខ្លួនលក្ខណៈគ្រួសារមុនពេលអាជីពប្រដាល់វ៉ៃលែងកើត៕