ព័ត៌មានជាតិ

ម្ចាស់ហាងកាហ្វេមួយរូប ប្រកាសបរិច្ចាគថវិកា១២០០ដុល្លារ ដល់អ្នកស្រលាញ់បរិស្ថាន

បានផុស

១១ ខែ មុន

នៅ

ថ្ងៃសៅរ៍ ៩ មីនា ២០២៤

ដោយ

អ្នកអត្ថាធិប្បាយបាល់ទាត់ ប្រកបដោយថ្វីមាត់ប្រចាំស្ថានីយទូរទស្សន៍BTV និងជាម្ចាស់យីហោឡានីត កាហ្វេហ្វីន លោក រស់ កាណាល់ បានប្រកាសផ្តល់បរិច្ចាគថវិកាចំនួន ១២០០ដុល្លារ ក្នុងមួយឆ្នាំដល់ក្រុមយុវជន ឬអ្នកស្រលាញ់បរិស្ថាននៅរាជធានីភ្នំពេញ។

ការរួមចំណែកបរិច្ចាគថវិកានេះត្រូវបានធ្វើឡើង បន្ទាប់ពីលោកកត់សម្គាល់ឃើញថា បរិមាណសំរាមនៅភ្នំពេញបានកើនឡើងប្រមាណ៣៧០០តោន ក្នុងមួយថ្ងៃ ហើយ២០% ជាសំណល់ប្លាស្ទិក។ ក្នុងនោះឡានីត កាហ្វេហ្វីន ទាំង ១០សាខា ក៏បានរួមចំណែកបង្កើតនូវសំណល់ប្លាស្ទិកមិនតិចដែរ។

“ខ្ញុំបានអានឯកសារមួយនៅភ្នំពេញតែមួយថ្ងៃ មានកាកសំណល់ជាង ៣៧០០តោន ហើយក្រុមហ៊ុនបីដែលទទួលសិទ្ធិប្រមូលសំរាមនៅភ្នំពេញ ដែលមានកន្លែងខ្លះបានប្រមូល និងកន្លែងខ្លះមានភាពខ្វះចន្លោះ ក្នុងហ្នឹងក៏មានថង់ប្លាស្ទិកពី ឡានីត កាហ្វេហ្វីនដែរ ដោយសារក្នុងមួយខែខ្ញុំប្រើអស់កែវជ័រជាង៣ម៉ឺន មានថង់ និងទុយយោប្លាស្ទិកថែមទៀត។ ហេតុនេះ ខ្ញុំចង់ចូលរួមជួយត្រលប់ទៅវិញ ជាផ្នែកមួយនៃការទទួលខុសត្រូវដ៏តិចតួចទៅសង្គមវិញ និងលើកទឹកចិត្តដល់បងប្អូនជាអ្នកជួយថែរក្សាបរិស្ថានរាជធានីភ្នំពេញ”។ លោក កាណាល់ បន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ហាបរិស្ថានត្រូវបានរាជរដ្ឋាភិបាលកម្ពុជា ចាត់ទុកជាវិស័យអាទិភាពមួយដែលបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច-សង្គម វប្បធម៌ និងទេសចរណ៍។ ដោយសារភាពរីកចម្រើនរបស់រាជធានីភ្នំពេញនេះ បានធ្វើឱ្យមានការកើនឡើងបរិមាណសំរាមរហូតដល់ ៣៧០០តោនក្នុងមួយថ្ងៃ ដែលជាកង្វល់មួយរបស់អាជ្ញាធរត្រូវយកចិត្តទុកដាក់។ យ៉ាងណាមិញបញ្ហាសំរាមត្រូវបានដោះស្រាយ ក្រោយមានការកែទម្រង់របស់រាជរដ្ឋាភិបាលកម្ពុជា លើការគ្រប់គ្រងសំរាម សំណល់រឹង នៅភូមិសាស្ត្ររាជធានីភ្នំពេញជាបន្តបន្ទាប់។

ជាចក្ខុវិស័យរយៈពេលវែង គ្រប់ម្ចាស់អាជីវកម្មទោះតូចក្តី ធំក្តី បើអាចធ្វើបាន គួរកាត់បន្ថយការប្រើប្រាស់ថង់ប្លាស្ទិកជាអតិបរមា។ប៉ុន្តែក្នុងករណីកាត់បន្ថយមិនបានទេ គួររួមចំណែកជាថវិកាក្នុងកម្រិតណាមួយដែលបានមកពីមុខរបរប្រចាំថ្ងៃរបស់យើង ទៅសង្គមវិញតាមរយៈការបរិច្ចាគដល់យុវជន ឬអ្នកស្រលាញ់បរិស្ថាន។នេះបើតាមការអះអាងរបស់លោក កាណាល់៕