នាវានាំភ្ញៀវទេសចរបរទេសជិត៥០០នាក់ ចូលចតនៅកំពង់ផែក្រុងព្រះសីហនុ

នាវាទេសចរណ៍ខ្នាតយក្សមួយគ្រឿងបានចូលចតនៅកំពង់ផែស្វយ័តក្រុងព្រះសីហនុនៅព្រឹកថ្ងៃទី ១១ ខែមីនា ឆ្នាំ​២០២៤ ដោយនាំក្រុមភ្ញៀវទេសចរបរទេសចម្រុះជាតិសាសន៍ ៤៦៣ នាក់ ចូលធ្វើទស្សនកិច្ចនៅក្រុងព្រះសីហនុ។

មន្ត្រីនគរបាលអន្តោប្រវេសន្តច្រកទ្វាអន្តរជាតិកំពង់ផែស្វយ័តក្រុងព្រះសីហនុបានឲ្យដឹងថា នាវាទេសចរណ៍បរទេសចំនួន​១គ្រឿង នេះ មានឈ្មោះ SEA BOURN ENCORE មានសញ្ជាតិ BAHAMAS មានបណ្តោយ ២១០.៥ម៉ែត្រ ទទឹង ២៨ម៉ែត្រ ជំរៅទឹក ៦ម៉ែត្រ បាននាំភ្ញៀវទេសចរចម្រុះជាតិសាសន៍ជាង ៤៦៣នាក់ ស្រី ២៣៥នាក់ ស្មើនឹង ២៤​សញ្ជាតិ និងមាននាវិកសរុបចំនួន ៤២២នាក់ ស្រី ១០០នាក់ ស្មើនឹង ៤៦សញ្ជាតិ។

មន្ត្រីដដែលបានឲ្យដឹងទៀតថា នាវាទេសចរណ៍បានធ្វើដំណើរមកពីប្រទេសវៀតណាមចូលសំចតនៅកំពង់ផែស្វយ័តក្រុងព្រះសីហនុ រយៈពេល១ថ្ងៃ តាមការគ្រោងទុកនាវានេះនិងចាកចេញពីកំពង់ផែស្វយ័តក្រុងព្រះសីហនុ នៅម៉ោង​២០យប់ថ្ងៃដដែលឆ្ពោះទៅកាន់ប្រទេសថៃ។

ភ្ញៀវទេសចរដែលធ្វើដំណើរតាមនាវានេះ មានសញ្ជាតិច្រើនជាងគេមានដូចជាអាមេរិក (USA) ១៦៦នាក់, អង់គ្លេស (BRITISH) ១២៥​នាក់ ក្រៅពីនោះមានភ្ញៀវសញ្ជាតិផ្សេងទៀត។

មន្ត្រីដដែលបានឲ្យដឹងទៀតថាបន្ទាប់នាវាចូលចត ក្រុមភ្ញៀវទេសចរនិងធ្វើដំណើរកម្សាន្តក្នុងក្រុងព្រះសីហនុ មានដូចជា ទីប្រជុំ ជនផ្សារលើ តំបន់រមណីដ្ឋានវប្បធម៌មានដូចជា វត្តឥន្ទញ្ញាណ, វត្តជោតញ្ញាណ តំបន់នេសាទទំនប់រលក (ភូមិ៣) និងតាមឆ្នេរក្នុងក្រុងព្រះសីហនុ។

ស្រុកព្រៃនប់ រូបសំណាកព្រះថោងនាងនាគ តំបន់អភិវឌ្ឍ Bay of Light (ឆ្នេររាម) តំបន់រមនីយដ្ឋានវប្បធម៌ (មជ្ឈមណ្ឌលវិបស្សនាធុរគិរីនាគវ័ន) និងតំបន់ទេសចរណ៍ក្នុងភូមិសាសន៍ឃុំរាម ក្នុងស្រុកព្រៃនប់។

ទន្ទឹមនោះ ក៏មានកិច្ចការពារសន្តិសុខ សុវត្ថិភាពសាធារណពីកងកម្លាំងមានសមត្ថកិច្ច ព្រមទាំងមានការសម្របសម្រួល​ពីអាជ្ញាធរក្រុង អាជ្ញាធរខេត្តព្រះសីហនុ ប្រកបដោយសុវត្ថិភាពផងដែរ៕

អត្ថបទ៖ ស៊ុយ ចាន់ធា