កីឡា

វិសាខា នៅតែមិនទាន់សម្រេចវិលចូល CPL និងពានសម្តេចតេជោវិញ

បានផុស

១២ ខែ មុន

នៅ

ថ្ងៃចន្ទ ១១ មីនា ២០២៤

ដោយ

ក្លិបបាល់ទាត់វិសាខានៅមិនទាន់សម្រេចចិត្តវិលត្រឡប់ចូលរួមប្រកួតពានរង្វាន់ដែលរៀបចំដោយក្រុមហ៊ុនខេមបូឌាន ព្រីមៀរលីគ (CPL) និងពានរង្វាន់សម្តេចតេជោ ហ៊ុន សែន វិញទេ បន្ទាប់ពីប្រកាសដកខ្លួនកាលពីថ្ងៃសុក្រ ទី៨ ខែមីនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សន្និសីទសារព័ត៌មានរៀបចំនៅល្ងាចថ្ងៃទី១១ ខែមីនា ឆ្នាំ២០២៤ នៅពហុកីឡដ្ឋានជាតិអូឡាំពិកចូលរួមដោយ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា ប្រធាននាយកដ្ឋានអាជ្ញាកណ្តាល អ្នកគ្រប់គ្រងផ្នែកការប្រកួត និងតំណាងក្លិបបាល់ទាត់វិសាខា បានបកស្រាយបំភ្លឺពីជុំវិញការកាត់សេចក្តីរបស់អាជ្ញាកណ្តាលលើទីលាន។

ប្រធាននាយកដ្ឋានអាជ្ញាកណ្តាលបានបញ្ជក់ថា ក្នុងជំនួបរបស់ វិសាខា ជាមួយ ភ្នំពេញក្រោន ជើងទី១ វគ្គពាក់កណ្តាលផ្ដាច់ព្រ័ត្រពានរង្វាន់សម្តេចតេជោ ហ៊ុន សែន ត្រឹមនាទី ១៨:១៥ មិនមែន Offside ទេ។ តាមពិតចំណុចនេះគឺបាល់ Onside ប៉ុន្តែអាជ្ញាកណ្តាលចាប់ Offside។

ជាមួយគ្នានេះ តំណាងសហព័ន្ធកីឡាបាល់ទាត់កម្ពុជា និងគ្រប់ក្លិបបើកទ្វារស្វាគមន៍ជានិច្ចការវិលត្រឡប់មកកាន់ពានរង្វាន់ខេមបូឌានលីគទី១ លីគទី២ និងពានរង្វាន់សម្តេចតេជោ ហ៊ុន សែន របស់ក្លិបបាល់ទាត់វិសាខា ប៉ុន្តែក៏ផ្នែកលើគោលការណ៍ច្បាប់របស់សហព័ន្ធកីឡាបាល់ទាត់អាស៊ី និងសហព័ន្ធកីឡាបាល់ទាត់ពិភពលោកដែរ ពីស្ថាប័នកីឡាបាល់ទាត់កំពូលទាំងពីរដែរ ពីព្រោះការដកខ្លួនរបស់វិសាខាដឹងឮដល់ស្ថាប័នទាំងពីរ។

កាលពីថ្ងៃទី៨ ខែមីនា ឆ្នាំ២០០២៤ វិសាខា បានប្រកាសដកខ្លួនពីការប្រកួតទាំងអស់ដែលរៀបចំដោយក្រុមហ៊ុន ខេមបូឌាន ព្រីមៀរលីគ រដូវកាល២០២៣-២៤ និងពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៧ រដូវកាល២០២៣-២៤ បន្ទាប់ពីអាជ្ញាកណ្តាលកាត់សេចក្តីដ៏ចម្រូងចម្រាសក្នុងការប្រកួតរបស់ម្ចាស់ផ្ទះវិសាខាជាមួយភ្នំពេញក្រោន ដែលបញ្ចប់ដោយលទ្ធផលស្មើគ្នា ២-២ ក្នុងជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់សម្តេចតេជោ ហ៊ុន សែន កាលពីថ្ងៃទី៦ ខែមីនា ឆ្នាំ២០២៤នៅកីឡដ្ឋានព្រីនស៍៕