ថៃ ចុះថ្លៃសំបុត្រយន្តហោះ២០% អំឡុងពិធីបុណ្យសង្ក្រាន្ត

ក្រុមហ៊ុនអាកាសចរណ៍ថៃ នឹងផ្តល់ការបញ្ចុះតម្លៃប្រហែល២០% លើជើងហោះហើរក្នុងស្រុកដែលចេញដំណើរពេលព្រឹកព្រលឹមនិងយប់ជ្រៅ ក្នុងឱកាសបុណ្យសង្ក្រាន្ត។ នេះបើយោងតាមអាជ្ញាធរអាកាសចរណ៍ស៊ីវិលថៃ (CAAT) និងត្រូវបានចុះផ្សាយដោយ​ The Nation នៅថ្ងៃចន្ទទី១១ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយករង CAAT លោក Sarun Benjanirat និយាយថា ក្រុមហ៊ុនអាកាសចរណ៍ចំនួន៦ គ្រោងដំណើរការជើងហោះហើរបន្ថែម១០៤ជើង នៅថ្ងៃទី១១, ១២, ១៥និង១៦ខែមេសា ដើម្បីឆ្លើយតបទៅនឹងសំណើរបស់រដ្ឋមន្ត្រីដឹកជញ្ជូនលោក Suriya Juangruangreangkit សុំឲ្យបញ្ចុះតម្លៃសំបុត្រយន្តហោះ ក្នុងអំឡុងពេលពិធីបុណ្យនេះ។

តាមការបញ្ជាក់ពីលោក Sarun, ជើងហោះហើរបន្ថែម នឹងហោះក្រៅម៉ោងធម្មតា ទាំងព្រឹកព្រលឹម ឬពេលយប់ជ្រៅ ហើយតម្លៃសំបុត្រទៀតសោត នឹងត្រូវបញ្ចុះតម្លៃដើម្បីទាក់ទាញអ្នកដំណើរ។ លោក​​បន្ត​ថា ជើង​ហោះ​ហើរ​បន្ថែម ​នឹងធ្វើដំណើរ​ទៅ​ Phuket, Chiang Mai, Samui, Ubon Ratchathani, Udon Thani និង Khon Kaen ហើយអ្នកដំណើរ អាចកក់សំបុត្រ នៅលើគេហទំព័ររបស់ក្រុមហ៊ុនអាកាសចរណ៍ទាំងឡាយបាន។

កាលពីខែកុម្ភៈ គណៈរដ្ឋមន្ត្រី​ថៃ បាន​អនុម័ត​ថវិកា​ប្រមាណ ១០៤លាន​បាត (ជិត៣លានដុល្លារ) ​ពី​មូលនិធិ​កណ្តាល ដើម្បី​រៀបចំ “ពិធីបុណ្យ​មហា​សង្ក្រាន្ត​ពិភពលោក” ឲ្យអធិកអធម នៅ​ទីក្រុង​បាងកក និង​ទូទាំង​ប្រទេស​ក្នុង​ខែមេសា​ខាងមុខនេះ។

រៀបចំដោយក្រសួងទេសចរណ៍និងកីឡា, ពិធីបុណ្យនឹងធ្វើឡើងចាប់ពីថ្ងៃទី១១ដល់ថ្ងៃទី១៥ខែមេសា នៅតាមគោលដៅពិសេសដូចជាលើផ្លូវ Sanam Luang និង Ratchadamnoen ក្នុងទីក្រុងបាងកក និងខេត្តចំនួន១៦ផ្សេងទៀត ដើម្បីបង្ហាញពី “ថាមពលទន់” របស់ប្រទេសថៃ ជាមួយការតាំងពិព័រណ៍ម្ហូបអាហារ លេងកីឡា ការប្រគំតន្ត្រីចូលរួមដោយតារាល្បីៗទាំងជាតិនិងអន្តរជាតិ យុទ្ធនាការអានសៀវភៅ បញ្ចាំងខ្សែភាពយន្ត លេងហ្គេម សម្តែងសិល្បៈ ការឌីហ្សាញ និងដើរម៉ូដ ដើម្បីជំរុញវិស័យទេសចរណ៍។

អ្នកនាំពាក្យរងរដ្ឋាភិបាល Kaenaka Oonchit និយាយថា ពិធីបុណ្យនេះ រំពឹងថា នឹងទាក់ទាញភ្ញៀវទេសចរជាង២០ម៉ឺននាក់មកលេងប្រទេសថៃ ដោយបង្កើតប្រាក់ចំណូលប្រហែល ៣.១ពាន់លានបាត និងនាំថៃ ឲ្យចូលទៅក្នុងបញ្ជីប្រទេសដែលមានពិធីបុណ្យល្អបំផុតលំដាប់ពិភពលោក។

អ្នកនាំពាក្យដដែលបន្តថា ព្រឹត្តិការណ៍​នេះ​ក៏សម្គាល់ជាការអបអរចំពោះការដែល​អង្គការ​យូណេស្កូ​ ដាក់​សង្ក្រាន្ត​​ថៃ ចូលជា​បេតិកភណ្ឌ​វប្បធម៌​អរូបី​នៃ​មនុស្សជាតិ ហើយបន្ទាប់ពីពិធីបុណ្យនេះ រដ្ឋាភិបាលក៏គ្រោងស្នើសុំសិទ្ធិប៉ាតង់រៀបចំពិធីបុណ្យមហាសង្ក្រាន្តពិភពលោកជារៀងរាល់ឆ្នាំផងដែរ។

សូមបញ្ជាក់ជាថ្មី ពិធីបុណ្យសង្ក្រាន្តចូលឆ្នាំថ្មីរបស់ ថៃ ត្រូវបានអង្គការយូណេស្កូ ដាក់បញ្ចូលទៅក្នុងបញ្ជីបេតិកភណ្ឌអរូបីនៃមនុស្សជាតិ កាលពីថ្ងៃពុធទី៦ខែធ្នូឆ្នាំ២០២៣ នាំឲ្យមានការអបអរសាទរទូទាំងប្រទេស។

យូណេស្គូ បានប្រកាសពីការសម្រេចដាក់បញ្ចូលពិធីបុណ្យសង្ក្រាន្ត ចេញពីប្រទេសបុតស្វាណា បន្ទាប់ពីថៃ ស្នើដាក់បញ្ចូលព្រឹត្តិការណ៍មួយនេះកាលពីឆ្នាំ ២០២០ មកម្ល៉េះ៕

អត្ថបទ៖ សុខ សុវណ្ណ

ចុចអាន៖​ ថៃ ជះលុយជិត ៣លានដុល្លារ រៀបចំ “ពិធីបុណ្យ​មហា​សង្ក្រាន្ត​ពិភពលោក” ឲ្យអធិកអធម ប្រមូលទេសចរ