​ពាណិជ្ជកម្មកម្ពុជា-អន្តរជាតិ ​មានទំហំទឹកប្រាក់ជាង ៨ ពាន់លានដុល្លារ កើនឡើងជិត ២០ ភាគរយ​

ទំហំពាណិជ្ជកម្មកម្ពុជា-អន្តរជាតិសម្រេចបានទឹកប្រាក់ជាង ៨ ពាន់លានដុល្លារ​នៅក្នុងរយៈពេល ២ ខែដើមឆ្នាំ ២០២៤ កើនឡើងជិត ២០ ភាគរយ បើធៀបរយៈពេលដូចគ្នា ឆ្នាំ ២០២៣ ខណៈការ​នាំចេញទំនិញ​របស់កម្ពុជាបានទឹកប្រាក់ជិត ៤ ពាន់លានដុល្លារ (៣.៩៨៥.៤៨២)កើន ២២ ភាគរយ។ នេះបើយោងតាមទិន្នន័យពីអគ្គនាយកដ្ឋាន​គយ និង​រដ្ឋាករកម្ពុជាចេញផ្សាយនៅថ្ងៃទី ១១ ខែមីនា ឆ្នាំ ២០២៤។

​របាយការណ៍ដដែលបង្ហាញថា ចាប់ពីខែមករា ដល់ខែកុម្ភៈ ឆ្នាំ ២០២៤ ការនាំចេញ នាំចូល​ទំនិញ​របស់​កម្ពុជា-អន្តរជាតិ គិតជាទឹកប្រាក់ជាង ៨,១២ ពាន់លានដុល្លារ កើនឡើង ១៩,២ ភាគរយ បើធៀប​រយៈពេលដូចគ្នា ឆ្នាំ ២០២៣។

​លោក ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានឱ្យដឹងថា ​កំណើននៃការផលិត ​របស់រោងចក្រសហគ្រាស ​មានភាពល្អប្រសើ​ ដែលធ្វើឱ្យការផលិតទំនិញមានការកើនឡើង ​ទាំង​ផលិត​ផលកសិកម្ម ​និងវាយភណ្ឌកាត់ដេរ កាបូប ស្បែកជើង គ្រឿងបរិក្ខាអគ្គិសនីជាដើម។

លោក លឹម ហេង បញ្ជាក់ថា ​សេដ្ឋកិច្ចនៅឆ្នាំ ២០២៤ នឹងមានភាពល្អប្រសើជាងឆ្នាំមុន ដោយសារវិស័យ​ពាណិជ្ជកម្ម ទេសចរណ៍ និងកសិកម្ម និងឧស្សាហកម្មមានភាពល្អប្រសើរ។

​អ្នកវិភាគសេដ្ឋកិច្ចលោក ចាន់ សុផល យល់ឃើញថា ​វិស័យទេសចរណ៍ ​និងកសិកម្ម​មានការ​កើន​ឡើង ​គួរឱ្យកត់ស្គាល់នៅឆ្នាំ ២០២៤ ​ខណៈពលរដ្ឋក៏ខិតខំបង្កើន​ផលិតកម្ម​ស្រូវកាន់តែច្រើន។ ​

​លោកថា ការនាំចេញទំនិញរបស់កម្ពុជាសម្រាប់បំពេញតម្រូវការទៅប្រទេសផ្សេងៗនៅពិភពលោក ​ដូច្នេះការកើនឡើងក៏អាស្រ័យលើស្ថានភាពសេដ្ឋកិច្ចនៅលើពិភពលោកផងដែរ ខណៈលោកអះ​អាងថា ស្ថានភាពសេដ្ឋកិច្ចនឹងរើបឡើងវិញក្នុងកម្រិត១ មិនទាន់ខ្ពស់នោះទេ ដោយសារតែសង្គ្រាម​នៅអូសបន្លាយ ​នយោបារូបិយវត្ថុអាមេរិកនៅតឹងតែង មិនបញ្ចេញលុយទៅលើទីផ្សារច្រើន និងអត្រាការប្រាក់ខ្ពស់ ដូច្នេះបរិយាកាសជំរុញការវិនយោគខ្ពស់មិនទាន់កើតឡើងនៅឆ្នាំនេះទេ។ ប៉ុន្តែទោះយ៉ាងណាក៏ប្រសើរជាងឆ្នាំកន្លងទៅ។​

ទំនិញសំខាន់ៗ ដែលកម្ពុជា នាំចេញរួមមាន៖ សម្លៀកបំពាក់ ស្រូវ អង្ករ ស្វាយចន្ទី កៅស៊ូ កង់ ម៉ាស៊ីន និងឧបករណ៍អគ្គិសនី គុជខ្យងធម្មជាតិ ឬចិញ្ចឹម ត្បូងថ្ម ស្បែកជើង ស្រោមជើង និងទំនិញផ្សេងៗដទៃទៀត៕

អត្ថបទ៖ ឡេង ដេត

​