កីឡា

ឈ្នះខ្សែក្រវាត់យប់មិញ ឈឿង ល្វៃ ទទួលបានប្រាក់ឧបត្ថម្ភជាង៤០លានរៀល

បានផុស

៩ ខែ មុន

នៅ

ថ្ងៃពុធ ១៣ មីនា ២០២៤

ដោយ

អ្នកលេងគុនខ្មែរ ឈឿង ល្វៃ បានក្លាយជាជាកីឡាករគុនខ្មែរទី១ឈ្នះខ្សែក្រវាត់កម្រិតពិភពលោក World Super-4 Championship នៅទឹកដីហុងកុង បន្ទាប់ពីបានយកឈ្នះដៃគូ២នាក់ជាប់គ្នានៅយប់ថ្ងៃទី១២ ខែមីនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅជុំទី១ អ្នកលេងគុនខ្មែរ ឈឿង ល្វៃ បានផ្តួលកីឡាករថៃ Fahsang តាមរយៈជង្គង់ និងកែងឲ្យសន្លប់ក្នុងទឹកទី១ដើម្បីឡើងទៅវគ្គផ្តាច់ព្រ័ត្រជួបកីឡាករអាល្លឺម៉ង់ Elysee Kochiese ដែលបានយកឈ្នះកីឡាករលីប៊ី Lamin Souayah ដោយពិន្ទុនៅជុំទី១។

នៅវគ្គផ្តាច់ព្រ័ត្រ ឈឿង ល្វៃ នៅតែធ្វើបានល្អទៀតដោយបានយកឈ្នះកីឡាករអាល្លឺម៉ង់ Elysee Kochiese ដោយពិន្ទុដើម្បីក្លាយជាម្ចាស់ខ្សែក្រវាត់កម្រិតពិភពលោក។ នេះជាខ្សែក្រវាត់ទី១ដែលអ្នកលេងគុនខ្មែររូបនេះបានឈ្នះនៅក្រៅប្រទេស ហើយក៏ជាកីឡាករគុនខ្មែរទី១បានឈ្នះខ្សែក្រវាត់នៅលើទឹកដីហុងកុង ប្រទេសចិន។

ការគ្រងខ្សែក្រវាត់កម្រិតពិភពលោកនេះ អ្នករៀបចំកម្មវិធីពិតជាធ្វើអបអរសាទរយ៉ាងខ្លាំងដោយបានថតរូបជាមួយយ៉ាងច្រើនកុះករ និងរាក់ស្វាគមន៍យ៉ាងកក់ក្តៅបំផុត។ ស្របពេលពិធីបំពាក់ខ្សែក្រវាត់ និងពានរង្វាន់បង្ហាញទង់ជាតិកម្ពុជាបានបង្ហាញឲ្យពិភពខាងកក្រៅបានឃើញ។

ទន្ទឹមជាមួយគ្នានេះ នៅប្រទេសកម្ពុជាក៏បានគាំទ្រលើកទឹកចិត្តយ៉ាងខ្លាំងតាមបណ្តាញទំនាក់ទំនងសង្គម។ ជាពិសេសថ្នាក់ដឹកនាំ និងសប្បុរសជនជាច្រើនបានឧបត្ថម្ភថវិកាជាបន្តបន្ទាប់ដើម្បីជាលើកទឹកចិត្តដល់កីឡាករ ឈឿង ល្វៃ។

ក្នុងនោះ សម្តេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានឧបត្ថម្ភថវិកាលើកទឹកចិត្តចំនួន២០លានដល់កីឡាករគុនខ្មែរ ឈឿង ល្វៃ ដែលទទួលបានជ័យជម្នះនៅលើទឹកដីហុងកុង។

សប្បុរសជនមានដូចខាងក្រោម៖

សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចំនួន២០លានរៀល
អ្នកឧកញ៉ា លាង ម៉េង ចំនួន១០លានរៀល
ឧកញ៉ា ស្រី ចាន់ថន ចំនួន៤លានរៀល
លោកស្រី ទ្រី ដាណា ចំនួន៤លានរៀ
លោក សឿ វណ្ណៈ ចំនួន៣លានរៀល

គិតតែចំនួនជាក់លាក់ខាងលើនេះគឺមានចំនួន៤១លានរៀល ហើយនឹងមានសប្បុរសជនផ្សេងៗដែលចូលរួមចំណែកលើកទឹកចិត្តដល់កីឡាករមកពីខេត្តកំពង់ធំ។

នេះជាសមិទ្ធផលអន្តរជាតិមួយទៀតដែល ឈឿង ល្វៃ នាំកិត្តិយសជូនជាតិ បន្ទាប់ពីរូបគេបានឈ្នះមេដាយមាសស៊ីហ្គេម ឆ្នាំ២០២៣ នៅកម្ពុជា និងមេដាយប្រាក់ស៊ីហ្គេម ឆ្នាំ២០២១ នៅប្រទេសវៀតណាម។ ជាមួយគ្នានេះ រូបគេក៏មានខ្សែក្រវាត់មួយចំនួនទៀតដែលបានឈ្នះនៅក្នុងប្រទេសកំណើត៕

អត្ថបទ៖ វីរបុត្រ